Listería í graflaxi frá Ópal sjávarfangi

Matvælastofnun varar neytendur við neyslu á lotu nr. 01.40.49 af graflaxi frá Ópal Sjávarfangi vegna greiningar listeríu (Listeria monocytogenes). Fyrirtækið hefur innkallað graflaxinn af markaði í samráði við Matvælastofnun.

Í byrjun árs fannst Listería í graflaxi frá Ópal Sjávarfangi.

Sjá einnig: Listería í graflaxi frá Ópal Sjávarfangi

Innköllunin á eingöngu við um eftirfarandi lotu:

• Vöruheiti: Graflaxbiti, heill m/roði, lofttæmdur
• Framleiðandi: Ópal Sjávarfang ehf, Grandatröð 4, 220 Hafnarfjörður
• Síðasti notkunardagur: 25.12.2019 26.12.2019, 27.12.2019 30.12.2019. 31.12.2019, 01.01.2020
• Lotunúmer: 01.40.49
• Strikamerki; 23 273 28 00000 V
• Framleiðsluland: Ísland
• Dreifing: Verslanir 10-11, verslanir Hagkaupa, verslanir Nettó, verslanir Kjörbúðarinnar, verslanir Krambúðarinnar, Melabúðin, verslanir Iceland, Seljakör

Neytendum sem keypt hafa vöruna er bent á að neyta hennar ekki og skila til verslunar eða fyrirtækisins gegn endurgreiðslu. Hægt er að hafa samband í síma 517 66 30 eða með tölvupósti [email protected] til að fá frekari upplýsingar.

Aukið eftirlit hefur verið með fyrirtækinu frá því að listería greindist í vörum þess í byrjun árs. Matvælastofnun tók sýni úr gröfnum og reyktum laxi í fyrirtækinu í desember og greindist listería í graflaxinum. Ópal sjávarfang hefur að kröfu Matvælastofnunar tekið reglulega sýni úr vörum þess til greiningar á listeríu. Listería hefur ekki greinst í innri eftirliti fyrirtækisins frá því að úrbótaraðgerðum lauk.

Listeria monocytogenes getur orsakað sjúkdóm bæði hjá mönnum og dýrum og kallast þessi sjúkdómur listeriosis. Einkenni sjúkdómsins eru mild flensueinkenni, vöðvaverkir, hiti og stundum ógleði og niðurgangur. Alvarlegri einkenni eru heilahimnubólga í ungbörnum, blóðeitrun og getur sjúkdómurinn einnig valdið fósturláti. Í einstaka tilfellum getur bakterían valdið dauða, þá er yfirleitt um að ræða einstaklinga sem eru með skert ónæmiskerfi.

Í flestum heilbrigðum einstaklingum veldur neysla á listeríumenguðum matvælum ekki sjúkdómi. Áhættuhópar eru barnshafandi konur, ófædd og nýfædd börn og einstaklingar með skert ónæmiskerfi. Hópsýkingar af völdum listeríu eru mjög sjaldgæfar, oftast er um að ræða einstaklingssýkingar.