Hamborgarakóngurinn í skemmtilegu viðtali

Hamborgarakóngurinn Tómas „Tommi“ Tómasson

„Meira en 70 prósent landsmanna vita hver ég er eða hafa heyrt um mig,“

segir Tómas „Tommi“ Tómasson matreiðslumeistari í samtali við theculturetrip.com, sem birtir skemmtilegt viðtal við meistarann sem sjá má með því að smella hér.

Um Tómas

Tómas Andrés Tómasson, betur þekktur sem Tommi á Búllunni, er einn eiganda og stofnenda Hamborgarabúllu Tómasar. Áður rak hann keðju hamborgarastaði undir nafninu Tommaborgarar en þeir veitingastaðir voru fyrsta skyndibitakeðjan á Íslandi.

Tómas hóf nám í matreiðslu árið 1967 í flugeldhúsi Loftleiða uppi á Keflavíkurflugvelli. Tommi rak Festi í Grindavík frá 1974 til 1977. Að loknu námi í Bandaríkjunum í hótel- og veitingarekstri stofnaði hann Tommaborgara 14. mars 1981.

Útibú spruttu upp út um allt land og urðu 26 talsins. Eftir þrjú ár hætti Tommi rekstri Tommaborgara, en síðan hefur hann rekið Hard Rock Café og Hótel Borg, auk þess sem hann stofnaði Kaffibrennsluna árið 1996 og sá um rekstur til ársins 2002.

Þann 14. mars 2004, klukkan 11 fyrir hádegi, þegar 23 ár voru liðin frá opnun Tommaborgara, opnaði Tommi nýjan hamborgarastað sem heitir Hamborgarabúlla Tómasar. Búllan er staðsett í bátslaga húsi að Geirsgötu 1, en útibú hafa verið stofnuð í Reykjavík, í Hafnarfirði, London, Noregi svo fátt eitt sé nefnt.

Mynd: skjáskot úr myndbandi.