1 milljarður í endurbætur á Hótel Loftleiðum

Reitir fasteignafélag og Icelandair Hotels endurnýjuðu í dag leigusamninga milli félaganna til ársins 2025. Um er að ræða samtals 29.532 fermetra og ná samningarnir til Hótels Loftleiða og Hilton Reykjavík Nordica.

Í fréttatilkynningu segir Magnea Þórey Hjálmarsdóttir, framkvæmdastjóri Icelandair Hótels, að samningarnir milli Reita og Icelandair Hotels fela einnig í sér að ráðist verður í gagngerðar endurbætur á húsnæði Hótels Loftleiða. Kostnaður við endurbæturnar er áætlaður hátt í 1 milljarður króna. Undirbúningur er þegar hafinn en framkvæmdir við Hótel Loftleiði munu hefjast upp úr áramótum og ljúka í byrjun sumars 2011. Gert er ráð fyrir að framkvæmdirnar muni skapa 80 ársverk.

Jafnframt segir í tilkynningunni að: „Við teljum að með samningum höfum við tryggt okkur hagstætt rekstraumhverfi með tilliti til húsnæðis og um leið skapað grundvöll fyrir frekari vöxt. Ferða- og ráðstefnuþjónusta er vaxandi iðngrein hér á landi og Icelandair Hotels er félag sem leikur eitt af lykilhlutverkum í þeim vexti“