Ísland með í heimsmeistarakeppni í fyrsta sinn

Nú rétt í þessu tilkynnti stjórn World Butchers Challenge (WBC) fleiri lönd sem taka þátt í heimsmeistarakeppni í kjötskurði sem fram fer í Sakramentó í Bandaríkjunum í september árið 2020.

Tólf þjóðir keppa um heimsmeistaratitilinn og þau þrjú lönd sem tilkynnt var í kvöld eru Ísland, Kanada og Mexíkó.  Er þetta í fyrsta sinn sem að Ísland tekur þátt í heimsmeistarakeppni í kjötskurði.

„Það er kominn tími á að við stígum út úr þægindarammanum og komum fram í dagsljósið.”

Sagði Jóhannes Geir Númason kjötiðnaðarmeistari í samtali við veitingageirinn.is, sem hefur staðið að undirbúningnum við stofnun landslið kjötiðnaðarmeistara.

Íslenska landsliðið mun skipa 6 manns og í heimsmeistarakeppninni fær hvert lið 3 klukkutíma og 15 mínútur til að úrbeina og útbúa vörur úr ½ svínaskrokk, ½ nautaskrokk, einum lambaskrokk og 5 kjúklingum.

Landslið kjötiðnaðarmanna hefur látið hanna merki fyrir landsliðið sem birt er hér með fréttinni.

„Við erum að láta hanna á okkur landsliðsbúninginn, búnir að láta hanna merki landsliðsins sem mun prýða nýja búninginn. Við fengum hönnuðinn Alexöndru Buhl til að hanna merkið og hafa til hliðsjónar gamla FÍK merkið sem við kjötiðnaðarmenn þykjum svo vænt um. Við erum nokkuð ánægðir með útkomuna.“

Sagði Jóhannes Geir að lokum.

Fleiri fréttir um  Landslið kjötiðnaðarmanna hér.