Benedikt og Guðmundur keppa fyrir Íslands hönd í Butcher Wars

Íslenskir kjötiðnaðarmenn láta til sín taka á alþjóðlegum vettvangi um helgina þegar tveir fulltrúar úr Landsliði kjötiðnaðarmanna keppa í Butcher Wars í Stuttgart.

Keppnin fer fram dagana 11. og 12. apríl í tengslum við BBQ Days hátíðina, þar sem leitað er að fremsta kjötiðnaðarmanni Evrópu sem og efnilegustu nýliðunum í greininni. Þeir Benedikt Þorvaldur Guðgeirsson Hjarðar og Guðmundur Bílddal keppa fyrir Íslands hönd og fá þar tækifæri til að sýna kunnáttu sína á sviði fyrir framan áhorfendur og myndavélar, en keppninni er einnig streymt á samfélagsmiðlum.

Verkefni keppenda er krefjandi og tíminn naumur. Þeir þurfa að úrbeina og skera svínahrygg, setja kjötið fram á borð á faglegan hátt og ganga frá framsetningu og skreytingu, allt innan 25 mínútna. Áhersla er lögð á nákvæmni og vinnubrögð í framsetningu.

Góður hópur íslenskra kjötiðnaðarmanna er staddur í Stuttgart um helgina og heimsótti F. Dick verksmiðjuna þar sem Marcus Kohler tók vel á móti hópnum.
Mynd: Facebook / Landslið Kjötiðnaðarmanna

Keppnin er tvískipt, annars vegar er keppt um titilinn „Overall Champion“ og hins vegar „Young Champion“ fyrir keppendur undir 23 ára aldri. Verðlaun eru veitt fyrir þrjú efstu sætin, þar sem sigurvegari fær 500 evrur, annað sætið 300 evrur og það þriðja 200 evrur.

Strangar reglur gilda um öryggi og vinnubrögð. Keppendur þurfa meðal annars að mæta með eigin verkfæri og hlífðarbúnað, þar á meðal keðjuhanska og hlífðarbúnað fyrir skurðvinnu og tryggja að öll vinnsla fari fram innan keppnistímans.

Þátttaka Íslands í keppninni undirstrikar vaxandi áhuga og metnað íslenskra kjötiðnaðarmanna á alþjóðlegum vettvangi, þar sem fagmennska og handverk eru í forgrunni.

Live stream hér.

Mynd: Facebook / Landslið Kjötiðnaðarmanna