Heimsfrægur kokteilabar frá Madríd kemur til Íslands: Salmon Guru pop-up hjá Tipsý

Diego Cabrera

Einn fremsti kokteilabar heims, Salmon Guru í Madríd, heldur sérstaka pop-up viðburði á Tipsý á Hafnarstræti, 19. og 20. júní.

Salmon Guru er enginn venjulegur bar – hann situr í 23. sæti á hinum virtu lista The World’s 50 Best Bars og hefur vakið heimsathygli fyrir framsækna og gáskafulla nálgun á kokteilagerð.

Viðburðurinn er einstakt tækifæri fyrir áhugafólk um hágæða kokteila til að upplifa töfra þessa rómaða staðar – í hjarta Reykjavíkur.

Stofnandinn sjálfur mætir – og stjörnuteymi með honum

Frá Madríd kemur sjálfur stofnandi Salmon Guru, Diego Cabrera, sem er talinn meðal áhrifamestu barþjóna heims í dag. Cabrera hefur hlotið fjölda viðurkenninga og verðlauna fyrir framlag sitt til kokteilalistarinnar og hefur með sínum sérstaka stíl haft djúp áhrif á þróun faggreinarinnar á alþjóðavísu.

Með honum í för verður öflugt teymi úr elítu spænska barheimsins:

Adrián Sehob, sem hefur verið útnefndur besti barþjónn Spánar og gegnir lykilhlutverki í rekstri Salmon Guru.

Ana Perez, markaðs- og viðburðastjóri barsins, sem stýrir mörgum af þeim eftirminnilegustu viðburðum og kynningum sem staðurinn stendur fyrir.

Gildin sem gera Salmon Guru einstakan

Salmon Guru er þekktur fyrir litríkan karakter og óhefðbundna framsetningu á kokteilum, þar sem sköpunarkraftur, leikgleði og framúrskarandi fagmennska fara saman. Einkunnarorð staðarins – „Aðeins dauðir laxar synda með straumnum“ – segja sitt um hugmyndafræðina: hér er ekkert tekið sem sjálfsagt, heldur er öllu snúið við, endurhugsað og fært upp á nýtt stig.

Viðburðurinn á Tipsý býður upp á sjaldgæfa innsýn í heim nýsköpunar og listar í kokteilagerð – og lofar einstökum kvöldum fyrir bragðlaukana.

Nánari upplýsingar um Salmon Guru má finna á heimasíðu þeirra: salmonguru.es

Myndir: salmonguru.es