Vel mætt á fyrstu fundina hjá KM á nýju ári – Myndir

Félagsfundir Klúbbs matreiðslumeistara (KM) eru reglulegir viðburðir þar sem meðlimir klúbbsins koma saman til að ræða faglega þróun, skipulagningu viðburða og nýjustu strauma í matargerð.

Í janúar voru fundir haldnir í Reykjavík, Akureyri og á Selfossi.

KM Reykjavík hélt fund 14. janúar sl. og var jafnframt fyrsti fundur á árinu eftir Hátíðarkvöldverðinn, sjá nánar hér.

Félagar KM voru boðaðir á Listasafn Íslands og var gestur fundarins Hildigunnur Birgisdóttir, en hún hannaði listaverkadisk hátíðarkvöldverðar KM 2025.

Félagar KM fengu umfjöllun um safnið og skoðuðu áhugasamir safnið í hólf og golf og Hildigunnur Birgisdóttir útskýrði fyrir félögum listaverkið sem hún hannaði fyrir Hátíðarkvöldverð KM.

Snædís er nýr yfirkokkur á Fröken Reykjavík

Eftir veru á listasafninu var haldið á Fröken Reykjavík á Hótel Reykjavík Saga. En þar tók á móti þjálfari Kokkalandsliðsins Snædís Xyza Mae Jónsdóttir yfirmatreiðslumaður. Snædís framreiddi ásamt frábærum hópi í eldhúsinu tveggja rétta máltíð sem var:

Tindabikkja, poppað capers, kryddjurtir, smælki með skessujurtakremi

og

Ástapunga með trönuberjum og karamellusúkkulaði, mysingskaramellu.

Á Fröken Reykjavík var fundi haldið áfram og farið yfir Hátíðarkvöldverð KM sem þótti takast mjög vel. Einnig var farið yfir það sem fram undan, en ekkert er slakað á í dagskrá KM og Kokkalandsliðsins.

KM Norðurland

KM Norðurlands hélt sinn fund á Ekrunni Óseyri 3, þriðjudaginn 14. janúar, þar sem Konráð Vestmann Þorsteinsson matreiðslumeistari og sölustjóri Ekrunnar á Akureyri tók vel á móti KM félögum.

Þórir Erlingsson forseti klúbbs matreiðslumeistara ávarpaði fundinn með fjarfundabúnaði. Ekran bauð upp á glæsilegan pinnamat.

Fundarefnið var farið yfir galadinnerinn, starfsemi Ekrunnar og næstu fundi hjá KM Norðurlands.

KM Suðurland

Janúar og jafnramt þorrafundur KM Suðurlands var haldinn 21. janúar að Tryggvaskála, Austurvegi 1 á Selfossi.  Almenn dagskrá var á fundinum.  Bjartmar Pálmason formaður KM Suðurlands bauð upp á glæsilegan þorramat. Bjartmar eða betur þekktur sem Batti Pálma starfar sem matreiðslumaður í mötuneyti fagfélaganna að Stórhöfða.

Að lokum var happadrætti að hætti Sunnlendinga, þ.e. allir taka með sér einn vinning.

Auglýsingapláss

Myndir: Aðsendar / Andreas Jacobsen / Kristinn Frímann Jakobsson