Snæbjörn eldar um 300 skólamáltíðir á dag – Býður upp á ekta íslenskan mat

Sigríður Benjamínsdóttir matartæknir, Snæbjörn Kristjánsson og Ásta G. Sveinsdóttir

Snæbjörn Kristjánsson matreiðslumeistari hefur hafið störf hjá grunnskólanum Hrafnagilsskóla í Eyjafjarðarsveit.

Þar eldar Snæbjörn fyrir skólabörnin ásamt því að sjá um að elda matinn fyrir leikskólann Krummakot og honum til aðstoðar eru Sigríður Benjamínsdóttir matartæknir og Ásta G. Sveinsdóttir.

Einfaldur og góður ekta íslenskur matur er á boðstólnum og má þar nefna pönnusteiktan fisk, soðna ýsu, lambalifur, kjötbollur og soðið slátur. Um 300 máltíðir eru eldaðar á dag og að auki er ávaxtastund um morguninn fyrir krakkana.

Snæbjörn lærði fræðin sín í mötuneyti MA, starfaði í Kaupmannahöfn í 1 ár, var á Fiðlaranum í 14 ár, Þýskalandi í 1 ár, Bandaríkin í ½ ár. Starfaði síðan á mötuneyti MA í 12 ár, fór á sjóinn sem kokkur í 2 ár. Vann hjá Kjarnafæði í 2 ár, og svo nú á Hrafnagilsskóla.

Til gamans má geta að Snæbjörn sigraði í matreiðslukeppninni Mondial des Chefs sem fram fór í París í Frakklandi árið 2012.

Sjá einnig: Snæbjörn sigraði í frönsku keppninni Mondial des Chefs – Vídeó

Snæbjörn Kristjánsson í 1. sæti í Mondial des Chefs

Keppendur voru matreiðslumenn sem störfuðu í opinberum eldhúsum, skólum, stofnunum og mötuneytum.

Snæbjörn þurfti að elda fyrir 10 manns í keppninni, Lambahrygg í aðalrétt og eftirrétt þar sem möndlur áttu að vera í aðalhlutverki, sjá uppskriftir hér.

Við óskum Snæbirni velfarnaðar í nýju starfi.

Myndir: aðsendar