Pierre Koffmann heimsótti Finnsson í Kringlunni – Myndaveisla

Franski stórkokkurinn Pierre Koffmann heimsótti Finnsson í Kringlunni í dag, 11. maí, þar sem Mata hf. stóð fyrir kynningarviðburði á Koffmann’s vörunum sem fyrirtækið hefur flutt inn til landsins undanfarna mánuði.

Gestum gafst kostur á að smakka vörur frá Koffmann’s, meðal annars franskar kartöflur og kartöflumús sem hafa vakið mikla athygli í veitingageiranum erlendis. Þá áritaði Pierre Koffmann einnig matreiðslubókina Classic Koffmann: A Chef’s Cookbook fyrir gesti sem mættu á svæðið.

Koffmann er einn virtasti franski kokkur sinnar kynslóðar og hefur haft mikil áhrif á veitingastaðamenningu í Bretlandi. Hann er þekktastur fyrir veitingastaðinn La Tante Claire í London sem opnaði árið 1977 og hlaut þrjár Michelin-stjörnur.

Hann hefur lengi verið þekktur fyrir að leggja áherslu á einfalt en kraftmikið bragð, byggt á hráefnum og matarmenningu frá Gascony-héraði í suðvesturhluta Frakklands.

Þrátt fyrir að nafn hans sé sterkt tengt hátæknilegri franskri matargerð hefur Koffmann einnig skapað sér orðspor fyrir kartöfluafurðir sínar. Koffmann’s franskar hafa á síðustu árum orðið vinsælar á mörgum af þekktustu brasseríum Bretlands og eru meðal annars notaðar á veitingastöðum tengdum Jamie Oliver og Gordon Ramsay.

Pierre Koffmann er oft kallaður „chef’s chef“ þar sem fjölmargir af þekktustu kokkum Bretlands lærðu hjá honum, þar á meðal Gordon Ramsay, Marco Pierre White, Marcus Wareing og Tom Kitchin. Hann hefur verið þekktur fyrir mikinn aga í eldhúsinu og þá trú að bragð og gæði hráefnis skipti meira máli en flókin framsetning.

Viðburðurinn á Finnsson vakti athygli fagfólks í veitingageiranum og mættu margir matreiðslumenn og gestir til að hitta Koffmann og kynna sér vörurnar betur.