Lítill áhugi á veitingasölu í Landeyjahöfn – Veitingamenn höfðu ekki trú á staðsetningunni

Eins og sjá má er stutt milli lands og eyja

Lítill sem enginn áhugi var meðal veitingamanna á að hefja rekstur á veitingasölu í nýju Landeyjahöfninni.

Þess í stað verða gestir og gangandi að treysta á sjálfsala í farþegarýminu og veitingasölu Herjólfs, en frá þessu er greint frá á vefnum pressan.is

Í samtali við Pressuna sagði Guðmundur Nikulásson, sem séð hefur um rekstur Herjólfs fyrir hönd Eimskips, að talsverðar breytingar verði á rekstrinum vegna styttri ferðatíma. Hingað til hefur fólk getað lagt sig í kojur en þess mun varla gerast þörf á hálftíma langri siglingaleiðinni. Veitingaþjónustu innanborðs verður jafnframt skorin niður og miðast við nýjar þarfir.

Guðmundur segir að um fjögur til fimm ársstörf skapist í Rangárþingi eystra vegna hafnarinnar en að sama skapi fækki þeim í Þorlákshöfn, líkt og Pressan sagði frá fyrr í dag.

Veitingarekstur í nýju 400 fermetra stóru húsnæði við höfnina var boðinn út, en að sögn Guðmundar reyndist lítill áhugi vera á því meðal veitingamanna og fór því svo að fallið var frá hugmyndum um veitingasölu að sinni. Þess í stað verður treyst á sjálfsala fyrir hungraða gesti en aðeins 20 mínútna akstur er frá höfninni til Hvolsvallar. Þar hafa veitingamenn hins vegar tekið við sér og stækkað veitingarými til mikilla muna, enda von á mikilli traffík til og frá Eyjum.

Landeyjahöfn var vígð með pompi og prakt klukkan 16:30 í dag. Þá sigldi Herjólfur í höfnina eftir sína síðustu ferð til Þorlákshafnar. Á morgun hefjast svo daglegar áætlanaferðir milli Landeyjahafnar og Vestmannaeyja og ríkir mikil gleði meðal sunnlendinga og Eyjamanna.

Greint frá pressan.is

Nánari umfjöllun um framkvæmd ofl. á vef sigling.is hér

Mynd: sigling.is