Heilum gámi af kampavíni stolið á leið til Íslands

Ölgerðin varð nýverið fyrir óvenjulegu áfalli þegar heill gámur af kampavíni sem var á leið til Íslands hvarf við flutningahöfnina í Rotterdam. Greint var frá málinu á mbl.is.

Í sendingunni voru meðal annars kampavín frá Moët & Chandon, Veuve Clicquot og Dom Pérignon auk rósavínsins Whispering Angel. Samkvæmt upplýsingum sem Ölgerðinni bárust var gámnum stolið áður en hann komst um borð í skip á leið til Íslands.

„Við héldum að sendingin væri komin af stað til Íslands en svo kom bara í ljós að það var enginn gámur til að sækja. Flutningsaðilinn greip bókstaflega í tómt þarna úti. Það var búið að ræna allri sendingunni,“

segir Egill Sigurðsson, vörumerkjastjóri hjá Ölgerðinni, í samtali við mbl.is.

Þrátt fyrir tjónið brást framleiðandinn Moët Hennessy hratt við og útbjó nýja sendingu sem kom til landsins í tæka tíð fyrir verslunarmannahelgina. Því ættu viðskiptavinir ekki að verða fyrir langvarandi skorti á kampavíni.

Hægt er að lesa nánar um málið á mbl.is.

Mynd: Pixabay. Tengist fréttinni ekki beint.