Kokkalandsliðið sýnir yfir 30 rétti á Ólympíuleikunum í matreiðslu í Erfurt í þýskalandi

Keppnin í köldu borði “Culinary Art” hefst snemma í fyrramálið, kl. 7 að íslenskum tíma, hjá Kokkalandsliðinu en liðið hefur verið síðustu tvo sólarhringa að undirbúa alla réttina á kalda borðið sem nú hefur verið stillt upp í keppnishöllinni í Erfurt í Þýskalandi. Á borðinu eru yfir 30 réttir ásamt sykurskreytingarverki. Í keppninni eru gerðar miklar kröfur um fjölbreytt og fagleg vinnubrögð, útlit og hráefnisnotkun þar sem hvert smáatriði skiptir máli.

Kokkalandsliðið leggur áherslu á að nota hágæða íslenskt hráefni í réttina sína. Á sýningarborðinu eru þrír forréttir, fjölbreyttir veisluréttaplattar, fimm rétta veislumatseðill, grænmetismatseðill, fingrafæði og margvíslegir eftirréttir og sykurskraut. Liðið hóf að undirbúa uppskriftir að réttunum fyrir 18 mánuðum. Innblásturinn er sóttur í Ísland og það sem land elda og íss gefur okkur.
Borðbúnaðurinn er einnig mikilvægur, en öll hráefni eru íslensk og var hönnun og framleiðsla í höndum HAF Studio. Borðbúnaðurinn er unninn úr íslensku birki, keramik, grásteini og glerungi.

Kokkalandsliðið keppir í tveimur greinum á Ólympíuleikunum í matreiðslu, IKA Culinary Olympics, sem fram fara í Þýskalandi. Liðið keppir í seinni keppnisgreininni, þar sem keppt er í heitum þriggja rétta máltíðum þriðjudaginn 25. október.

Kokkalandsliðið 2016

Í Kokkalandsliðinu eru: Hafliði Halldórsson framkvæmdastjóri liðsins, Þráinn Freyr Vigfússon faglegur framkvæmdastjóri, Bjarni Siguróli Jakobsson fyrirliði, Björn Bragi Bragason forseti KM/framkvæmdastjórn, Steinn Óskar Sigurðsson liðsstjóri, Jóhannes Steinn Jóhannsesson liðsstjóri, Fannar Vernharðsson, Ylfa Helgadóttir, Hafsteinn Ólafsson, Axel Clausen, Garðar Kári Garðarsson, Hrafnkell Sigríðarson, Atli Þór Erlendsson, Sigurður Ágústsson, Georg Arnar Halldórsson og María Shramko.