Just Wingin It vann til fimm verðlauna í Buffalo

Just Wingin It vann til fimm verðlauna á National Buffalo Wing Festival, sem haldin var í Buffalo í New York um helgina. Hátíðin fagnaði 25 ára afmæli sínu í ár og komu þátttakendur víða að.

Teymið seldi rúmlega 11.500 kjúklingavængi á tveimur dögum og hlaut fyrir vikið verðlaunin „Festival Favorite“ fyrir flesta selda vængi.

Þá var Bayside Buffalo Lemon Honey-sósa staðarins valin besta sósa hátíðarinnar og hlaut verðlaunin „Best in Show“. Alls kepptu meira en 100 sósur um titilinn.

Sósan hefur ekki verið á matseðli Just Wingin It undanfarna sex mánuði, en aðstandendur staðarins gefa til kynna að breyting verði þar á innan skamms.

Þrenn önnur verðlaun

Í frétt bandaríska miðilsins Erie News Now kemur fram að Just Wingin It hafi einnig hlotið fyrstu verðlaun í flokki sterkra bragðtegunda fyrir Ghost Pepper Wing Tang Clan-sósuna.

French Toast Wing hlaut jafnframt önnur verðlaun í vali unga fólksins og þriðju verðlaun í flokki sætra bragðtegunda.

Justin Shouse, eigandi Just Wingin It, er fæddur og uppalinn í Erie í Pennsylvaníu. Hann flutti til Íslands fyrir 21 ári og hefur síðan byggt upp veitingarekstur hér á landi þar sem bragð og hefðir frá vesturhluta New York og norðvesturhluta Pennsylvaníu eru í forgrunni.

Justin sagði árangurinn hafa verið afrakstur góðrar liðsheildar. Í bandaríska teyminu voru meðal annars veitingamenn og aðrir liðsmenn með sterk tengsl við Erie.

Meðal gesta sem smökkuðu vængi Just Wingin It á hátíðinni var Khalil Shakir, leikmaður Buffalo Bills í bandarísku NFL-deildinni.

Aðstandendur Just Wingin It þökkuðu bæði íslenska og bandaríska teyminu fyrir þeirra framlag, auk starfsfólks og skipuleggjenda hátíðarinnar.

Myndir: Facebook / Just Wingin It