Rannsókn á alvarlegu E. coli-hópsmiti enn ólokið

E. coli fannst í hakki sem notað var í máltíð barnanna á Mánagarði.
Mynd: úr safni

Rannsókn lögreglu á E. coli-hópsmitinu sem kom upp á leikskólanum Mánagarði í Reykjavík í október 2024 er enn til meðferðar hjá ákærusviði Lögreglunnar á höfuðborgarsvæðinu.

RÚV greindi frá því að einn einstaklingur væri enn með réttarstöðu sakbornings vegna málsins. Fleiri höfðu áður þá stöðu, þar á meðal matráður leikskólans og Félagsstofnun stúdenta, sem rekur Mánagarð.

Árni Bergur Sigurðsson, settur sviðstjóri ákærusviðs, vildi ekki upplýsa RÚV um hver væri enn með stöðu sakbornings. Þá liggur ekki fyrir hvort ákæra verður gefin út í málinu.

Hópsmitið kom upp eftir hádegisverð á leikskólanum 17. október 2024. Alls greindust 49 einstaklingar með E. coli-smit, þar af 45 börn á Mánagarði.

Tólf börn voru lögð inn á Barnaspítala Hringsins, þar af fimm á gjörgæslu. Tvö börn þurftu á skilunarmeðferð að halda vegna nýrnabilunar og að minnsta kosti eitt barn þurfti að fara í öndunarvél.

Rannsókn á hópsmitinu leiddi í ljós að sama afbrigði E. coli-bakteríunnar fannst í sýnum úr börnum og í hakki sem notað var við matseld á leikskólanum. Raðgreining á erfðaefni bakteríanna sýndi að uppruninn var sá sami.

Í upplýsingum Reykjavíkurborgar um rannsókn málsins kom jafnframt fram að meðferð hakksins við matseldina hefði verið ófullnægjandi. Hakkað kjöt þarf að gegnumsteikja þannig að kjarnhiti nái að minnsta kosti 75 gráðum.

Tengt efni:

Engin krafa um menntun eða fræðslu – Nauðsynlegt að herða reglur og auka fræðslu um matvælaöryggi