Tilkynning frá Suðurnesjabæ vegna umfjöllunar um Sjávarsetrið

Veitingageirinn.is hefur borist tilkynning frá Suðurnesjabæ í kjölfar fréttar þar sem eigandi Sjávarsetursins gagnrýnir harðlega meintan mismun Suðurnesjabæjar á fyrirtækjum. Sjá fréttina hér.

Tilkynningin frá Suðurnesjabæ er birt hér að neðan óbreytt.

Leiðrétting á rangfærslum um málefni Suðurnesjabæjar

Í umfjöllun eins af eigendum Sjávarsetursins í Sandgerði á Facebook síðu, sem ratað hefur í fjölmiðla er fjallað um fjölda atriða sem fæst eiga við rök að styðjast og telur sveitarfélagið rétt að bregðast við því. Hér að neðan er farið yfir nokkur atriði sem fram koma í umfjölluninni.

Í umfjölluninni er fjallað um félagið Garðskaga ehf. sem leigir húsnæði af sveitarfélaginu. Þar er því haldið fram að bæjarstjóri og einn bæjarfulltrúi hafi persónulegra hagsmuna að gæta og séu eigendur í félaginu. Hið rétta er að sveitarfélagið hefur átt lítinn hlut í Garðskaga ehf í um áratug og tilnefndi bæjarstjórn bæjarstjóra sem fulltrúa sveitarfélagsins í stjórn félagsins ásamt einum bæjarfulltrúa sem varamann. Hvorugur þessara einstaklinga eiga eignarhlut í félaginu og hafa því engra persónulegra hagsmuna að gæta. Upplýsingar um eignarhluti sveitarfélagsins í þessu félagi og öðrum er að finna í ársreikningum Suðurnesjabæjar.

Varðandi fullyrðingar um að skuldir hafi verið afskrifaðar, þá er það heldur ekki samkvæmt sannleikanum. Þegar bæjarstjórn samþykkti endurskoðaðan samning við Garðskaga ehf varðandi leigu á húsnæði sveitarfélagsins á Garðskaga, þá var þar um að ræða uppgjör á annars vegar leigugreiðslum og hins vegar rekstrarkostnaði húsnæðis sem sveitarfélaginu ber að greiða og aðilar voru sammála um.

Í sömu umfjöllun er því einnig haldið fram að önnur fyrirtæki hafi fengið afskrifaðar skuldir við sveitarfélagið án þess að það sé nánar tilgreint. Sveitarfélagið frábiður sér svona fullyrðingar enda eiga þær sér ekki stoð í raunveruleikanum.

Einnig er því haldið fram að sveitarfélagið hafi ekki átt viðskipti við Sjávarsetrið síðan um mitt ár 2023, en rétt er að viðskipti sveitarfélagsins við Sjávarsetrið, bæði í beinum reikningsviðskiptum og með innkaupakortum, frá því um mitt ár 2023 er upp á rúmlega 5,2 milljónir króna og í raun mun meiri en við aðra veitingaaðila í sveitarfélaginu. Varðandi matarkaup starfsfólks bæjarskrifstofa, þá hafa starfsmenn vikulega sameiginlegan hádegisverð og eru kaup á þeim mat á höndum starfsmanna sjálfra, sem ákveða hverju sinni hvernig því sé háttað.

Varðandi fullyrðingar vegna sölu á fasteign sveitarfélagsins sem til stóð að rífa, þá er vísað í skýringar sveitarfélagsins um það mál, sem var einnig til umfjöllunar i fjölmiðlum á sínum tíma.

Hvað varðar kaup á mat fyrir eldri borgara í Suðurnesjabæ þá hefur ýmist verið keypt af veitingaaðilum tilbúinn matur eða eldað á staðnum. Þessi kaup hafa verið af nokkrum mismunandi aðilum og upphæðir vel undir útboðsmörkum. Í lok síðasta árs var haft samband við fjóra veitingaaðila varðandi verðfyrirspurn ásamt því að reynt var ítrekað að hafa samband við Sjávarsetrið án þess að það bæri árangur. Í kjölfarið var ákveðið að kaupa þjónustu frá einum aðila sem hefur bæði boðið góð verð og þjónustu. Verði framhald til lengri tíma á því að sveitarfélagið kaupi tilbúinn mat og umfang aukist má búast við því að framkvæmd verði verðkönnun eða útboð varðandi slíka þjónustu.

Sveitarfélagið harmar að bornar séu fram ósannar fullyrðingar um stjórnendur og kjörna fulltrúa sem hafa neikvæð áhrif á orðspor sveitarfélagsins. Eðlilegt er að skoðanir séu mismunandi á starfsemi sveitarfélaga en mikilvægt er að þær séu byggðar á réttum upplýsingum.

Umræddum veitingaaðila í Suðurnesjabæ er óskað velfarnaðar í sínum rekstri.