Omegn & Venner taka yfir SKÁL! við Njálsgötu

Maria Lesi, yfirkokkur Omegn & Venner í Kaupmannahöfn.

Það verður sannkallaður danskur bragur á SKÁL! við Njálsgötu í Reykjavík dagana 5. og 6. október þegar gestir frá Omegn & Venner í Kaupmannahöfn taka höndum saman við teymi staðarins.

Omegn & Venner er staðsett í Torvehallerne í Kaupmannahöfn og hefur skapað sér nafn fyrir matargerð þar sem gott hráefni er í forgrunni. Mikil áhersla er lögð á samstarf við smærri framleiðendur og einfaldan en vandaðan mat.

Að Omegn & Venner standa Denny og Sarah ásamt yfirkokknum Mariu Lesi.

Heimsóknin er hluti af viðburðaröð SKÁL! þar sem erlendir kokkar og veitingamenn koma til landsins og vinna með teyminu að sérstökum kvöldum.

Gísli Matt, einn eigenda SKÁL!, segir að lengi hafi staðið til að gera meira af viðburðum af þessu tagi.

„Okkur hefur lengi langað að gera meira af svona kvöldum á SKÁL! og fá hingað fólk sem við sjálf höfum áhuga á og finnst vera að gera spennandi hluti.

Omegn & Venner passar sérstaklega vel við okkur. Þau leggja mikla áherslu á gott hráefni, framleiðendur og einfaldan en virkilega góðan mat,“

segir Gísli.

Fimm rétta matseðill

Teymin tvö hafa sett saman sérstakan fimm rétta matseðil undir stjórn Thomas Lorentzen, yfirkokks SKÁL!, þar sem íslenskt hráefni fær að njóta sín.

Meðal þess sem verður á boðstólum eru grilluð lambahjörtu á teini með reyktu eggaldini og stökkum eldpipar. Einnig verður boðið upp á handtínda hörpuskel með grænkáli og XO-sósu.

Saltbakaður sólkoli verður borinn fram með nýjum íslenskum kartöflum, graslauk og kræklingasósu.

Gestir fá einnig að smakka einn af þekktari réttum Omegn & Venner, kjúklingalifrarparfait með pikkluðum rabarbara og ristuðu mjólkurbrauði.

Í eftirrétt verða íslensk aðalbláber með bláberjakaramellu og ís.

Viðburðurinn fer fram á SKÁL! við Njálsgötu 1 dagana 5. og 6. október. Tekið verður á móti gestum á tveimur tímum hvort kvöld og kostar fimm rétta matseðillinn 14.900 krónur á mann.

Myndir: aðsendar