Gestakokkar frá Líbanon taka yfir eldhúsið á Sumac

Joyce og Gab koma með líbanska stemningu í eldhúsið á Sumac.

Veitingastaðurinn Sumac í Reykjavík tekur á móti tveimur gestakokkum frá Líbanon dagana 26. og 27. september þegar Joyce og Gab stíga inn í eldhúsið og bjóða upp á sjö rétta líbanska veislu. Þær hafa starfað á virtum veitingastöðum í Beirút og meðal annars á Baron, sem hefur hlotið viðurkenningu á lista World’s 50 Best Restaurants fyrir Miðausturlönd og Norður-Afríku.

Baron er staðsett í Mar Mikhael-hverfinu í Beirút og hefur á undanförnum árum fest sig í sessi sem einn af eftirsóttustu veitingastöðum borgarinnar. Þar er áhersla lögð á ferskt hráefni, árstíðabundinn mat og samsetningar sem blanda saman hefðum og nýsköpun. Staðurinn hefur margsinnis verið valinn besti veitingastaður Líbanons og endaði síðast í 42. sæti á listanum yfir bestu veitingastaði MENA-svæðisins.

Með reynslu úr þessu umhverfi koma Joyce og Gab til Íslands með sterka sýn á líbanska matargerð. Sjö rétta matseðillinn sem þær setja saman á Sumac verður byggður á hefðbundnum hráefnum og bragði frá Líbanon en með nútímalegri nálgun sem endurspeglar það hvernig unga kokkakynslóðin í Beirút nálgast arfleifð sína.

Gestir geta átt von á réttum þar sem ferskleiki, krydd og áferð fara saman í upplifun sem ber með sér bæði menningu og sögur landsins.

Það er ekki á hverjum degi sem íslenskir matargestir fá tækifæri til að upplifa líbanska veislu í höndum kokka sem hafa mótast af líflegu matar- og veitingalífi Beirút. Sumac býður því upp á einstakt kvöld þar sem mið-austurlensk stemning og íslenskt notalegt andrúmsloft mætast.

Myndir: facebook / Sumac