Verðlaunum heitið fyrir upplýsingar um innbrotin

Brotist var inn í veitingastaðina Tryggvaskála og Kaffi krús á Selfossi með rúmlega viku millibili á síðustu dögum en sami rekstraraðili rekur staðina.

Fyrra innbrotið átti sér stað á Kaffi krús aðfaranótt föstudagsins 25. júlí, en aðfaranótt síðastliðins mánudags í Tryggvaskála. Bæði innbrotin voru framin á slaginu klukkan 4 að nóttu og báðum tilvikum braut þjófurinn rúðu og kom sér inn í kjölfarið.

Það er þjófavarnarkerfi á báðum stöðum og vaktmaður frá Securitas var kominn á vettvang innan tveggja mínútna, en þjófurinn var farinn í bæði skiptin

, sagði Tómas Þóroddsson, veitingamaður, í samtali við sunnlenska.is.

Þjófurinn hafði ekki mikið uppúr krafsinu, á Kaffi krús var ódýrustu vodkaflöskunni stolið en í Tryggvaskála hvarf sjóðsvél með skiptimynt og tipskrús með um tíu þúsund krónum.

Við bjóðum verðlaun fyrir þann sem getur gefið upplýsingar um innbrotin og er þá hægt að hafa samband beint við okkur á staðnum eða við lögregluna í síma 480-1010

, sagði Tómas ennfremur.