The Coocoo’s Nest hreppti titilinn Súrdeigsbrauð ársins

Verðlaunagripurinn

Keppnin um súrdeigsbrauð ársins 2019 fór fram föstudaginn 11. október og voru viðbrögðin við henni í alla staði frábær.

Tíu bakarí af öllu landinu skráðu sig í keppnina og mátti hvert bakarí aðeins senda inn eitt brauð, sem annað hvort væri í sölu eða yrði til sölu eftir keppnina. Að morgni keppnisdags streymdu brauðin inn bæði með flugi og strætó.

Í gær voru úrslitin kynnt og bar súrdeigsbrauðið frá The Coocoo’s Nest sigur úr býtum, enda þótti það listilega vel gert brauð, einstaklega fallegt, ilmríkt og bragðgott. Svo gott að fólk ætti að gera sér ferð út á Granda til að næla sér í eitt slíkt.

Lucas Keller, eigandi The Coocoo’s Nest

Það var frú Eliza Reid, forsetafrú sem afhenti The Coocoo’s Nest verðlaunin Súrdeigsbrauð ársins 2019-2020.

Eliza Reid afhendir Lucas verðlaunin

Það voru aðstandendur tímaritsins Fæða|Food – A Little Taste of Iceland sem stóðu fyrir keppninni í tilefni af því að fjórða tölublað tímaritsins er væntanlegt.

Eitt aðalþema næsta tölublaðs er bakstur og íslenskar hefðir sem tengjast bakstri. Meðal efnis er íslenska flatkakan, endurkoma brauðtertunnar, veisluhefðir landans, íslenskt kaffibrauð og byltingin sem orðið hefur í súrdeigsbakstri á Íslandi.

Í dómnefnd sátu:

• Árni Ólafur Jónsson – gestaritstjóri Fæða|Food 2019, kokkur og sjónvarpsmaður
• Dominique Plédel Jónsson, formaður Slow Food samtakanna á Íslandi og eigandi Vínskólans
• Ragnheiður Maísól Sturludóttir, listamaður og stofnandi Facebook-hópsins Súrdeigið

Dómnefndin gaf einkunn út frá bragði, þéttleika, skorpu, ilmi, útliti o.fl. Almennt var dómnefndin mjög sátt við gæðin á súrdeigsbrauðunum sem voru send inn en þrjú brauð voru þó stigahæst:

• Litla brauðstofan – Hveragerði – bakari: Dörthe Zenker frá Þýskalandi
• The Coocoo’s Nest – Reykjavík – bakari: Lucas Keller frá Bandaríkjunum
• Sandholt bakarí – Reykjavík – bakari: Bashir Mirafghan frá Afganistan

Sérstaka viðurkenningu hlaut Sigfús hjá Brauðhúsinu Grímsbæ fyrir framúrskarandi brauð og fyrir að vera brautryðjandi í súrdeigsbakstri á Íslandi. Brauðið frá Brauðhúsinu var eina heilkorna formbrauðið sem sent var inn og því töluvert ólíkt hinum brauðunum í keppninni.

Við óskum Coocoo’s Nest innilega til hamingju með sigurinn.

Myndir: aðsendar