Skelfiskmarkaðurinn býður upp á íslenskar ostrur

Fyrstu íslensku ostrurnar eru væntanlegar á markað á næstunni. Tilraunir sem hófust með ostrurækt á Húsavík fyrir fimm árum hafa nú borið þennan árangur og verða í aðalhlutverki á Skelfiskmarkaðinum.

Árið 2013 fluttu tveir Húsvíkingar inn smáostrur frá eldisstöð á Norður-Spáni og hófu tilraunir með að rækta þær áfram í búrum í Skjálfandaflóa, segir í kvöldfréttum RÚV. Ostrur höfðu þá hvergi í heiminum verið ræktaðar svo norðarlega, en ostran dafnaði vel í köldum sjónum.

Eins og fram hefur komið þá er Skelfiskmarkaðurinn nýjasta viðbót í veitingaflóru Reykjavíkur sem staðsettur er við Klapparstíg 28-30 í Reykjavík, en framkvæmdir standa yfir og stefnt er á að opna sem allra fyrst.

Eigendur Skelfiskmarkaðarins eru Hrefna Rósa Jóhannsdóttir Sætran, Guðlaugur Frímannsson, Axel Clausen matreiðslumenn og Ágúst Reynisson og Eysteinn Valsson framreiðslumenn.

Staðurinn tekur 160 manns í sæti og að auki er mjög gott útisvæði við veitingastaðinn. Axel Björn Clausen verður yfirmatreiðslumaður og yfirþjónn verður Eysteinn Valsson.

Mynd: úr safni