Myndir: Veislusýning Múlabergs fór fram úr væntingum

Glæsileg veislusýning fór fram hjá Múlaberg Bistro & Bar á Akureyri síðastliðinn laugardag þegar fjölmörg fyrirtæki komu saman og kynntu vörur og þjónustu fyrir þá sem hyggja á veisluhöld og hátíðleg tilefni.

Boðið var upp á litríka og fjölbreytta dagskrá þar sem gestir gátu kynnt sér það sem í boði er fyrir veislur af ýmsu tagi. Veitingaaðilar buðu jafnframt upp á smakk svo gestir gætu metið gæði og úrval og fengið faglega ráðgjöf um skipulagningu og útfærslu.

Sýningin var haldin í annað sinn, en hún var sett á laggirnar í fyrra. Þá fór aðsókn fram úr öllum væntingum að sögn aðstandenda og ljóst var að þörf var á vettvangi af þessu tagi á svæðinu. Í ár var ekki síðra uppi á teningnum.

Í tilkynningu frá Múlaberg Bistro & Bar á Facebook segir orðrétt.

„Veislusýningin síðustu helgi fór fram úr öllum okkar væntingum.“

Þar kemur jafnframt fram að tæplega 400 gestir hafi sótt sýninguna og að mikið hafi verið rætt um hversu falleg og vel heppnuð hún var.

Aðstandendur segja sérstaklega ánægjulegt að heyra hversu ánægðir gestirnir voru með viðburðinn. Eftir þær viðtökur sé vart annað í stöðunni en að endurtaka leikinn.

„Eftir svona viðtökur er eiginlega ekki spurning, við gerum þetta tvímælalaust aftur á næsta ári,“

segir enn fremur í tilkynningunni.

Með viðburðinum hefur Múlaberg Bistro & Bar fest sig í sessi sem samkomustaður fyrir fagfólk og almenning sem vill kynna sér það besta sem í boði er þegar kemur að veislum og hátíðlegum stundum á Norðurlandi.

Myndir: Facebook / Múlaberg Bistro & Bar