Leita að fulltrúa Íslands í alþjóðlega matreiðslukeppni – umsóknarfrestur til 1. september

Umsóknarfrestur í íslensku undankeppni Arctic Young Chef hefur verið framlengdur til 1. september næstkomandi. Kokkar og matreiðslunemar, 24 ára og yngri, eru hvattir til að skrá sig til þátttöku.

Landskeppni Íslands fer fram í Reykjavík laugardaginn 5. september. Allt að átta keppendur verða valdir til þátttöku og munu þeir etja kappi um að verða fulltrúi Íslands í úrslitakeppni Arctic Young Chef.

Sigurvegari íslensku undankeppninnar hlýtur 100 þúsund krónur í verðlaun og tryggir sér jafnframt sæti í úrslitakeppninni. Þar verður keppt um 250 þúsund króna aðalvinning og titilinn Arctic Young Chef.

„Við viljum ná til sem flestra ungra kokka um allt land, bæði þeirra sem eru í námi og þeirra sem þegar eru byrjaðir að vinna á veitingastöðum.

Þetta er einstakt tækifæri til að keppa á alþjóðlegum vettvangi, kynnast jafnöldrum frá hinum Norðurlöndunum og sýna hvað íslensk matreiðsla og íslenskt hráefni hafa upp á að bjóða,“

segir Hinrik Carl Ellertsson matreiðslumeistari og verkefnastjóri Arctic Young Chef á Íslandi.

Opið faglærðum kokkum og matreiðslunemum

Þátttaka er opin faglærðum kokkum og matreiðslunemum sem eru 24 ára og yngri og búsettir á Íslandi. Allt að átta umsækjendur verða valdir til að taka þátt í landskeppninni.

Skráning og nánari upplýsingar um þátttökuskilyrði má finna á ayc.fo hér. Umsóknarfrestur er til og með 1. september 2026.

Arctic Young Chef er alþjóðleg matreiðslukeppni fyrir unga kokka frá Íslandi, Færeyjum, Noregi og Grænlandi. Keppnin er skipulögð undir merkjum norræna samstarfsverkefnisins NORA og var sett á laggirnar til að vekja athygli á hæfileikum ungra kokka á Norður-Atlantshafssvæðinu og efla notkun staðbundinna hráefna.

Landskeppni fer fram í hverju þátttökulandi og mætast sigurvegararnir að lokum í sameiginlegri úrslitakeppni.

Hægt er að skoða yfirlit yfir fréttir af Arctic Young Chef með því að smella hér.