Lambamínútusteik – Grænpiparmajo – Stökkar kartöflur – Kremað salat

Hráefni

Lambamínútusteik

800 gr þunnar sneiðar af lambi, svokölluð mínútusteik.
2 msk. ólífuolía
2 hvítlauksgeirar, kramdir
½ sítróna, börkur rifinn fínt
u.þ.b. ¼ tsk. sjávarsalt
u.þ.b. ⅛ tsk. svartur pipar, nýmalaður
1 uppskrift kremað salat
400 g franskar, steiktar eða aðrar kartöflur ef vill
¼ sítróna, skorin í báta

Kremað salat

1 skalotlaukur, saxaður smátt
½ tsk. sjávarsalt
1 msk. rauðvínsedik
3 msk. sýrður rjómi 18%
150 ml ólífuolía
4 msk. graslaukur, fínt skorinn
1 romain salat, einnig hægt að nota jöklasalat
¼ tsk. svartur pipar, nýmalaður
½ sítróna, safi

Grænpiparmajo

3 dl gott majones
1 dl grísk jógúrt
1 msk grænpipar (niðursoðinn)
1 msk hunang
Sítrónusafi

Leiðbeiningar

Lambamínútusteik

Þunnt skorið lambakjöt af ýmsum bitum hentar hér vel. Blandið ólífuolíu, hvítlauk og sítrónuberki saman í lítilli skál. Þerrið kjötið og setjið á fat. Hellið kryddleginum yfir og nuddið vel yfir allt kjötið.

Hitið pönnu eða grill og hafið á háum hita. Saltið og steikið kjötið í 1-2 mín. á hvorri hlið, eða eftir smekk.

Kryddið með nýmuldum pipar, setjið kjötið yfir á bretti með álpappír yfir og látið hvíla í a.m.k. 5 mín. áður en það er borið fram með grænpiparmajo, stökkum kartöflum og kremuðu salati ásamt sítrónu til að kreista yfir ef vill.

Kremað salat

Setjið skalotlauk, ½ tsk. af salti og edik í skál og hrærið saman, látið standa við stofuhita í 15 mín.

Blandið sýrðum rjóma og ólífuolíu saman við ásamt 2 msk. af graslauk.

Rífið salatið gróft niður, þvoið og þerrið það vel. Setjið í skál og blandið saman við ½ tsk. af salti og svörtum pipar. Blandið sítrónusafa saman við salatið og setjið það yfir á disk.

Dreypið sósunni yfir salatið rétt áður en það er borið fram og sáldrið yfir restinni af graslauknum.

Grænpiparmajo

Saxið helminginn af piparnum og hrærið allan piparinn saman við majones, jógúrt og hunang. Smakkið til með salti og sítrónusafa.

Mynd og uppskrift: islensktlambakjot.is