Lambakonfekt með ristuðu kartöflusalati og rauðlauki með fetaosti

Hráefni

• 850 g lambakonfekt
• 80 ml kókósmjólk
• 60 g rautt karrímauk
• 1 msk. límónusafi
• 1 tsk. sjávarsalt
• ½ tsk. nýmalaður svartur pipar
• límónusneiðar,til að bera fram með

Setjið kókosmjólk, karrímauk, límónusafa, salt og pipar í skál og blandið saman. Bætið kjötinu út í blönduna og nuddið saman við. Setjið til hliðar í 15 mín. Hitið   grillpönnu eða aðra pönnu og hafið á miðlungsháum hita. Steikið lambið í 4-5 mín. á hvorri hlið og berið fram með límónusneiðum til að kreista örlítið yfir kjötið, ásamt kartöflusalati og grilluðum rauðlauk.

Ristað kartöflusalat

• 1,5 kg kartöflur, gott er að nota möndlukartöflur
• 2 msk. ólífuolía
• 1-2 tsk. sjávarsalt
• ½ -1 tsk. nýmalaður svartur pipar
• 200 g 36% sýrður rjómi
• 2 msk. gróft sinnep
• 60 ml vatn
• hnefafylli dill,skorið gróflega

Sjóðið kartöflurnar í 8-10 mín. Hellið frá vatninu og skerið í tvennt. Setjið á bakka, penslið með olíu og saltið og piprið, í 180°C heitan ofn í 10 mín. Setjið sýrðan rjóma, sinnep, vatn, ½ tsk. salt og ¼ tsk. pipar í skál og blandið saman. Setjið kartöflurnar á fat og hellið sósunni yfir. Sáldrið yfir örlitlu salti og pipar ásamt dilli.

Rauðlaukur með fetaosti

• 2 rauðlaukar, afhýddir og skornir í þykkar sneiðar
• 1 msk. ólífuolía
• 1-2 tsk. sjávarsalt
• ½ -1 tsk. nýmalaður svartur pipar
• 60 ml hunang
• ¼ tsk. cayenne-pipar
• u.þ.b. 120 g fetaostur, hreinn
• 3-4 msk. pekanhnetur, ristaðar
• 2 msk. graslaukur, gróft skorinn

Setjið laukinn í skál með köldu vatni og látið standa í 10-15 mín. Hitið grill eða grillpönnu og hafið á háum hita. Sigtið vatnið frá og þerrið laukinn. Dreypið ólífuolíu yfir laukinn og sáldrið yfir salti og pipar. Grillið laukinn í 15-20 mín. eða þar til hann er hefur náð góðum lit að utan og er mjúkur að innan.

Á meðan laukurinn er að eldast setjið hunang, cayenne-pipar og ¼ tsk. salt í litla skál og blandið saman. Setjið laukinn á fat og sáldrið yfir fetaosti, pekanhnetum og graslauk.

Dreypið því næst sósunni yfir og berið fram.

Uppskrift frá www.icelandiclamb.is