Fisherman á Suðureyri færir út kvíarnar og opnar sælkerabúllu í Reykjavík

„Við erum rosa spennt og í óða önn að gera og græja Sælkerabúllu Fisherman á Hagamel 67 í Vesturbænum. Hér ætlum við að bjóða upp á skemmtilega fiskrétti til að borða á staðnum og til að taka með heim“

, segir í tilkynningu frá ferðaþjónustufyrirtækinu Fisherman.

Fisherman er öflugur ferðaþjónn í sjávarþorpinu Suðureyri á Vestfjörðum sem rekur verslun, veitingar og gistihús þar í bæ.

Nú eru framkvæmdir í fullum gangi á húsnæði við Hagamel 67 þar sem Fisherman kemur til með að opna fiskbúð og bjóða upp á fiskrétti, ýmsa smárétti, þ.e. fiskisúpur, bláskel, tacos, snakkbox svo fátt eitt sé nefnt.

„Þetta er bara lítið fjölskyldufyrirtæki sem við höfum verið að byggja upp sl. 13 ár“

, sagði Elías Guðmundsson framkvæmdastjóri í samtali við veitingageirinn.is árið 2013, aðspurður um starfsemina hjá Fisherman.

Þau hjónin Jóhanna Þorvarðardóttir og Elías Guðmundsson keyptu lítið hús árið 2000 á Suðureyri sem til stóð að rífa.  Húsið var endurbyggt sem lítið gistiheimili og um vorið 2001 var tekið á móti fyrsta gestinum.  Í gegnum árin hefur reksturinn stækkað jafnt og þétt með því að fjölga herbergjum, breyta gistiheimilinu í hótel, opna veitingahús og síðan var litlum söluskála bætt við reksturinn.

Mynd: skjáskot af google korti