Áætlað að um 30 ný veitingahús opni í miðborg Reykjavíkur á næstu 18 mánuðum

Áformað er að opna minnst 30 veitinga­hús í miðborg Reykjavíkur á næstu 18 mánuðum. Samhliða þessari sögulegu fjölgun bendir margt til að mörg veitingahús í miðborginni standi ekki undir núverandi leigu. Það gæti þýtt sársaukafulla aðlögun.

Helgi S. Gunnarsson, forstjóri Regins, segir í samtali við Morgunblaðið, dæmi um að búið sé að „keyra svo upp leiguna að staðirnir ráða ekki við það“. Vegna breyttrar stöðu í veitingageiranum hefur Reginn endurskoðað áform um fjölda veitingarýma á Hafnartorgi.

Eins og rakið var í Morgunblaðinu í gær eru vísbendingar um að spár um fjölgun ferðamanna í ár rætist ekki. Það sama gildir um veitingahús og hótel að fyrirhugað er að stórauka starfsemina í miðborginni næstu ár. Mun sá rekstur eiga mikið undir því að ferðamönnum fjölgi meira. Þeir hagsmunir ná líka til lífeyrissjóða, að því er fram kemur í fréttaskýringu um mál þetta í Morgunblaðinu í dag.

Mynd: úr safni