Nýir rekstraraðilar á Harbour House á Siglufirði

Gestur Þór Guðmundsson, Sigmar Bech og í stólnum situr Sigríður Vilhjálmsdóttir
Mynd: Trölli.is

Nú á dögunum tóku þeir Gestur Þór Guðmundsson og Sigmar Bech við rekstrinum á veitingahúsinu Harbour House á Siglufirði.

Harbour House er staðsett á hafnarsvæðinu á Siglufirði og býður upp á ferskt sjávarfang eins og fiskisúpu, bleikju, þorsk og annað ferskmeti sem fæst á svæðinu.

Fiskisúpa Harbour House
Mynd: facebook / Harbour House

Einnig verður boðið upp á smurbrauð og þá nýung að hafa brunch um hádegi á laugar- og sunnudögum. Það er greinilegt að gestir eru ánægðir með Harbour House, en staðurinn hefur fengið ágætis einkunn á TripAdvisor.

Gestur Þór Guðmundsson er menntaður leiðsögumaður og hefur starfað sem slíkur undanfarin ár. Sigmar Bech er framreiðslumaður að mennt og starfaði síðast á Sigló Hótelinu. Sigmar og Gestur eiga tvö fyrirtæki í ferða- og veitingaþjónustu, annað er Wild Tracks sem sér um útleigu á fjallahjólum ásamt leiðsögumennsku.

Veitingahúsið Harbour House er staðsett á hafnarsvæðinu á Siglufirði.
Mynd: facebook / Harbour House

Til liðs við Sigmar og Gest Þór er Sigríður Vilhjálmsdóttir, menntaður matsveinn og hefur starfað sem kokkur undanfarin 30 ár, mun hún ráða ríkjum í eldhúsinu.

Harbour House verður hugsað sem miðstöð á Siglufirði fyrir upplýsinga- afþreyingarþjónustu fyrir ferðamenn með mat og afþreyingu, þar sem hægt verður að njóta ljúffengra veitinga og leigja fjallahjól, sjóbretti eða fá leiðsögn um umhverfið í kring.

Harbour House er staðsett þar sem rauða örin sýnir
Mynd: facebook / Harbour House

Að auki munu þeir Gestur og Sigmar annast rekstur og umsjón tjaldsvæðanna sumarið 2018. Tjaldsvæðin á Siglufirði eru tvö, annað staðsett í miðbænum við ráðhústorgið og smábátabryggjuna og hitt sunnan við snjóflóðavarnargarðinn Stóra bola.  Það var Trölli.is sem greindi fyrst frá.