Sjallanum á Ísafirði breytt í verslun

Sjálfstæðishúsið, sem gegnt hefur hlutverki skemmtistaðs Ísfirðinga og nærsveitunga svo lengi sem elstu menn muna, en þeir muna nú ekki neitt eins og séra Baldur í Vatnsfirði sagði, hefur skipt um hlutverk og mun í framtíðinni hýsa verslun Þrists.

Miklar framkvæmdir hafa staðið yfir í húsinu undanfarið enda eru innréttingar og skipulag skemmtistaðar ekki hentugar fyrir verslunarrekstur. Gólfið undir dansgólfinu verður tekið niður í götuhæð að mestu, nýir gluggar settir í framhlið hússins sem og ný hurð. Ekki er ákveðið hvenær verslunin flytur en það verður á næstu mánuðum.

Þristur verður áfram með verslun í húsnæði vélsmiðju sinnar. Þá hefur Þristur einnig sent inn erindi til bæjaryfirvalda þess efnis að gangstétt fyrir framan húsið verði endurgerð þar sem ástand hennar sé ekki viðunandi.

Greint frá á BB.is

[email protected]