Rauðvín klámmyndastjörnu slær í gegn

Bandaríska klámmyndastjarnan Savanna Samson, réttu nafni Natalie Oliveros, hefur slegið óvænt í gegn og þá ekki fyrir vafasama „leiklist“ heldur rauðvín sem hún lagði við nafn sitt og andlit. Einn virtasti víngagnrýnandi heims, Robert Parker, gaf víninu 90-91 stig af 100 mögulegum í einkunn í gagnrýni sinni. Klámmyndastjarnan virðist því hafa haslað sér völl á nýju og virðulegra sviði.

Oliveros segist ekki hafa ráðist í verkefnið af léttúð heldur þótt það áskorun, enda vínframleiðandinn, Robert Cipresso, virtur í sínu fagi. Hún hafi sannfært Cipresso um að ráðast í verkefnið, en hann er m.a. einn af vínsölum þeim sem birgja Páfagarð í Róm.

Oliveros hélt til Toscana-héraðs á Ítalíu og smakkaði þar tugi víntegunda Cipresso. Að lokum valdi hún eitt og pantaði 400 kassa. Vínið heitir Sogno Uno og er frá 2004 en á flöskunum er mynd af klámmyndastjörnunni í gegnsæjum náttkjól. Víngagnrýnandinn sem lofaði vín Oliveros er einn sá áhrifamesti í heimi og segir hann vínið framúrskarandi. Parker tók það fram í gagnrýni sinni að myndin á flöskunni hefði ekki haft áhrif á dóminn.

Oliveros, eða Samson eins og hún heitir í klámmyndabransanum, er afar vinsæl og hlaut m.a. verðlaun sem besta leikkonan á klámmyndaverðlaunahátíð AVN, sem Reuters segir jafnast á við Óskarsverðlaunin í þeim geira. Samson segir foreldra sína aldrei hafa jafnað sig á því áfalli að dóttir þeirra væri klámmyndaleikkona en nú geti þau vonandi verið stolt af henni.

Af mbl.is

Heiðar Birnir Kristjánsson
[email protected]