Eldaði þorskhaus og lúðusúpu fyrir Rick Stein

Einn þekktasti sjónvarpskokkur Breta, Rick Stein, er staddur hér á landi við upptökur á nýrri sjónvarpsþáttaröð. Afraksturinn verður sýndur á BBC food í byrjun sumars.
Mynd t.v.: Rick Stein og Gísli Matthías Auðunsson yfirmatreiðslumaður á Matur og Drykkur. Mynd t.h.: Rick Stein og Ragnar Eiríksson yfirmatreiðslumaður á Dill restaurant

Einn þekktasti sjónvarpskokkur Breta, Rick Stein, er staddur hér á landi við upptökur á nýrri sjónvarpsþáttaröð. Stein hefur um árabil verið þekktasta andlit BBC á þessu sviði. Á meðal veitingastaða sem Stein hefur heimsótt eru Matur og Drykkur þar sem hann fékk þjóðlega rétti.

„Við elduðum fyrir hann okkar útgáfu af lúðusúpu og líka þorskhaus,“

segir Gísli Matthías Auðunsson matreiðslumaður í samtali við ruv.is en hann er einn eiganda staðarins Matar og Drykkjar. Brasaður þorskhaus Gísla og félaga hefur vakið þó nokkra athygli.

Gísli segir að Stein muni heimsækja nokkra veitingastaði hér á landi auk þess að skoða annað tengt mat og drykk.

„Hann er að taka upp nýja seríu og fer til nokkurra stórborga.“

Gísli segir aðspurður að um mikinn heiður sé að ræða fyrir þá hjá Mat og drykk.

„Hann er auðvitað algjör goðsögn í þessum bransa og búinn að vera fremsti kokkur BBC í áratugi. Þetta er góð kynning fyrir okkur og auðvitað Ísland.“

Gísli, sem einnig á og rekur Slippinn í Vestmannaeyjum, segir að Stein stefni einnig að því að veiða fisk af bryggju á meðan hann er hér og jafnvel að ná sér í eina lopapeysu.

Svo virðist sem Stein hafi látið drauminn um íslensku lopapeysuna rætast en hann birti mynd af sér í einni slíkri á Twitter. Myndina má sjá hér að neðan.

Arctic times for @Rick_Stein , great view from our room @IcelandairHotel #lovereykjavik pic.twitter.com/jXnwD9TiOo

— Sarah Stein (@sasstein) February 1, 2016

Greint frá á ruv.is