„Þetta er galið“ segir Gunnar Karl – Þriðja svindlsíðan komin í loftið

Enn og aftur hefur nafn og ímynd Gunnars Karls Gíslasonar, Michelin-kokks, verið misnotuð í tengslum við svokallaðar svindlsíður sem auglýsa vörur í hans nafni án hans samþykkis. Um er að ræða endurtekið mynstur þar sem ljósmyndir og fullyrðingar um meðmæli eru settar fram til að auka trúverðugleika vafasamra netverslana.

Í nóvember síðastliðnum komu upp tvær slíkar heimasíður þar sem Gunnar Karl átti að hafa mælt með pönnum, skurðarbrettum og öðrum eldhúsbúnaði. Hann tilkynnti málið þá þegar og virtist sú aðgerð bera einhvern árangur. Í dag er vefslóðin titannord.com óvirk, en þegar reynt er að fara inn á titanicraft.com er notendum nú áframsent á aurevaisland.com, sem samkvæmt öllum ytri merkjum virðist vera enn ein svindlsíðan í sama dúr.

Sjá einnig: Gunnar Karl segir markaðsefni Titanicraft algjörlega á skjön við raunveruleikann

Nú hefur þriðja heimasíðan bæst í hópinn. Hún ber heitið Takumi Hrafn (takumihrafn.store) og auglýsir sölu á hnífum sem sagðir eru „mælt með af fagfólki“. Þar er Gunnar Karl áberandi í kynningarefni, ásamt fleiri íslenskum fagmönnum, þar á meðal Ragnari Eiríkssyni og Ólafi Erni framreiðslumanni.

„Þetta er galið,“

segir Gunnar Karl í samtali við Veitingageirinn.is þegar hann er spurður út í nýju heimasíðuna.

Við nánari skoðun á heimasíðunni Takumi Hrafn kemur í ljós að hún er alfarið á íslensku, en fjölmargir textar bera skýr merki vélþýðingar og virðast vera orðréttar þýðingar úr erlendu efni, líkast til með Google Translate. Slíkt dregur enn frekar úr trúverðugleika síðunnar.

Facebook-síða Takumi Hrafn var stofnuð fyrir aðeins fimm dögum og inniheldur afar takmarkað efni. Engar skýrar upplýsingar eru þar að finna um rekstur, ábyrgðaraðila eða tengiliði, sem er algengt einkenni síðna sem settar eru upp í skamman tíma í þeim tilgangi að blekkja neytendur.

Veitingageirinn.is hvetur fagfólk jafnt sem almenning til að sýna aðgát þegar vörur eru keyptar á netinu, sérstaklega þegar auglýsingar byggja á meðmælum þekktra einstaklinga. Jafnframt er mikilvægt að þeir sem verða varir við slíka misnotkun tilkynni hana til viðeigandi aðila og láti fjölmiðla vita, svo unnt sé að vara aðra við.

Myndir: Skjáskot af auglýsingum á Facebook og skjáskot af heimasíðunni takumihrafn.store