Hættulega góðar ostakökukúlur með Biscoff og hvítu súkkulaði

Hættulega góðar ostakökukúlur með Biscoff og hvítu súkkulaði

Þessar kúlur eru hættulega góðar og hafa slegið í gegn alls staðar þar sem þær mæta. Afar einfaldar og fljótlegar og á allra færi. Upplagt að útbúa á aðventunni og eiga inni í ísskáp eða frysti.

Einföld uppskrift gerir um 30 litlar kúlur.

Innihald:

200 g rjómaostur til matargerðar frá Gott í matinn

2 msk. Biscoff krem í krukku

250 g Biscoff kex eða annað kanilkex

300 g hvítt súkkulaði

Aðferð:

Myljið kexið smátt. Blandið vel saman rjómaosti, kexi og Biscoff kremi.

Útbúið litlar kúlur og frystið í smástund.

Bræðið súkkulaði á meðan. Hjúpið frystar kúlurnar með hvítu súkkulaði. Skreytið með aðeins meira súkkulaði og örlitlu muldu kexi.

Geymist vel í ísskáp eða frysti.

Höfundur: Helena Gunnarsdóttir – gottimatinn.is