6.000 máltíðir eldaðar daglega fyrir sjúklinga og starfsfólk – Bólusetning fyrir matreiðslumeistara?

Klúbbur matreiðslumeistara (KM) í Reykjavík hélt marsfund sinn þann 4. mars á Sjúkrahóteli Landspítalans. Matreiðslumeistararnir Magnús Örn Guðmarsson, starfsmaður sjúkrahótelsins, og Haraldur Helgason, teymisstjóri í eldhúsi Landspítalans, tóku á móti fundargestum með glæsilegum veitingum í anddyri sjúkrahótelsins.

Saltkjöt og baunir á boðstólum

Gestir fengu að skoða eldhúsið þar sem um 6.000 máltíðir eru framleiddar daglega, auk þess sem þeir heimsóttu Elmu, matsal starfsmanna. Að skoðunarferð lokinni buðu gestgjafarnir upp á hefðbundið saltkjöt og baunir, sem féllu vel í kramið.

Árni Þór Arnórsson, formaður KM Reykjavík, setti fundinn og bauð matreiðslumenn velkomna.

Bólusetning fyrir matreiðslumeistara?

Bólusetning fyrir matreiðslumeistara? Að sjálfsögðu voru veitingar í fljótandi formi líka – en bara til gamans!
Fjoridsemmed 20 mg: Gefist í munn fyrir máltíð. Til notkunar við ofáti á saltkjöti.
Domperidone 20 mg: Gefist í munn fyrir máltíð. Vegna: Vinnuleiða, vanvirkra bragðlauka og þrekleysi. Aukaverkanir: Hömlulausar hugmyndir, lélegt skopskyn.

Framtíð matreiðslunáms kynnt á fundinum

Hermann Þór Marinósson, Hinrik Carl Ellertsson og Ægir Friðriksson.

Á fundinum var kynnt nýtt námsefni í Hótel- og matvælaskólanum, sem samanstendur af rafrænum bókum fyrir matreiðslu á matvælabraut, bæði fyrir 1. þrep og 2. og 3. þrep.

Sjá einnig: Fyrsta heildstæða kennsluefnið í matreiðslu gefið út eftir 70 ára kennslusögu

Höfundar þessara bóka eru Hermann Þór Marinósson, Hinrik Carl Ellertsson, Sigurður Daði Friðriksson, Ragnar Wessman og Ægir Friðriksson. Þeir Ægir, Hinrik og Hermann kynntu efnið og bentu á að hægt er að nálgast bækurnar á vefbok.is hjá Iðnú.

Það helsta úr starfi KM – Þórir Erlingsson fór yfir málin

Þórir Erlingsson tók einnig til máls og sagði frá ýmsu sem hefur gerst undanfarið og því sem er framundan hjá KM.  Að venju var happdrætti haldið með veglegum vinningum. KM Reykjavík þakkar Landspítalanum og félögunum Magnúsi Erni og Haraldi Helgasyni fyrir góðar móttökur.

Myndir: kokkalandslidid.is