Sómi kaupir Þykkvabæjarkartöflur | Kaupverðið er trúnaðarmál

Sómi hefur fest kaup á Kartöfluverksmiðju Þykkvabæjar hf. með þeim fyrirvara að Samkeppniseftirlitið heimili kaupin.

Það hefur verið skrifað undir kaupsamning en beðið er eftir samþykki Samkeppniseftirlits,

segir Alfreð Hjaltalín, framkvæmdastjóri Sóma í samtali við visir.is.

Alfreð á ekki von á því að gera verulegar breytingar á rekstri fyrirtækisins.

Ætlun okkar er að reka þetta áfram í óbreyttri mynd,

segir hann.

Alfreð segir kaupverðið trúnaðarmál en send verði út tilkynning með nánari upplýsingum þegar kaupin verða formlega gengin í gegn.

Þykkvabæjar hafði verið í söluferli hjá KPMG frá því í vor. Nokkrir aðilar sýndu áhuga á að kaupa fyrirtækið.   Viðskiptablaðið greindi frá því að Íslensk ameríska hefði skoðað að kaupa fyrirtækið en ekkert varð úr.

Hluthafar Þykkvabæjar eru á fjórða tug. Fyrirtækið hefur sérhæft sig á síðustu árum í fullvinnslu á kartöflum til neytenda. Rúmlega tuttugu starfsmenn starfa hjá fyrirtækinu. Hagnaður þess var 13 milljónir króna árið 2013.

Greint frá á visir.is.

Mynd: úr safni