Nýr rekstraraðili tekur við Pakkhúsinu í Ólafsvík

Nýir leigjendur taka við Pakkhúsinu í Ólafsvík þar sem saga, menning og kaffiveitingar verða í forgrunni.

Nýr kafli er að hefjast í rekstri Pakkhússins í Ólafsvík eftir að Snæfellsbær undirritaði nýverið leigusamning við Yevheniia Korchyha um rekstur hússins.

Yevheniia hyggst opna starfsemi undir nafninu Pakkhúsið Saga & Kaffi, þar sem lögð verður áhersla á að sameina menningu, sögu og léttar veitingar. Samhliða rekstrinum mun hún áfram taka á móti gestum á safnið á efri hæðum hússins, en á jarðhæðinni verður saga samfélagsins gerð skil ásamt því að boðið verður upp á kaffiveitingar og minjagripi.

Pakkhúsið í Ólafsvík var reist árið 1844 og er eitt fárra varðveittra verslunarhúsa frá 19. öld á Íslandi. Húsið var friðað árið 1970.

Pakkhúsið hefur um árabil gegnt mikilvægu hlutverki í menningarlífi Ólafsvíkur og á sér langa og merkilega sögu. Samhliða nýjum rekstri hafa Hollvinasamtök Pakkhússins unnið að uppsetningu sýningar um verslunarsögu bæjarins sem verður aðgengileg gestum á opnunartíma staðarins, samkvæmt upplýsingum á vef Snæfellsbæjar.

Með þessu er stefnt að því að Pakkhúsið verði á ný lifandi samkomustaður allan ársins hring. Íbúar og gestir eru hvattir til að líta við, kynna sér sögu Ólafsvíkur og njóta þess sem nýr rekstraraðili hefur upp á að bjóða í þessu sögufræga húsi.

Myndir: snb.is