Matarveislan mikla 2006 – Sýnd í Ríkissjónvarpinu

Dagana 22. til 25.febrúar fór fram í fimmta skiptið Food and Fun-hátíðin í Reykjavík.

Hróður hátíðarinnar eykst með hverju árinu og æ fleiri nýta sér tækifærið til þess að kynnast nýjum og skemmtilegum áherslum í matargerð. Í ár kom fjöldinn allur af erlendum kokkum til landsins til þess að matreiða ýmsar kræsingar fyrir landann á veitingastöðum borgarinnar.

Hápunktur hátíðarinnar var án efa keppni sem fór fram á milli erlendu kokkanna, en þar þurftu þeir að töfra fram framandi rétti á stuttum tíma og einungis nota íslenskt hráefni. Keppnin var spennandi og úrslitin komu skemmtilega á óvart. Ljóst er að Food and Fun-hátíðin er búin að festa sig í sessi, bæði á meðal fagmanna og áhugamanna um matargerð.

Í þættinum Matarveislan mikla verður fylgst með þessari miklu hátíð og áhorfendur fá tækifæri til að kynnast þeim fjölmörgu og ólíku kokkum sem tóku þátt í hátíðinni. Kynnir er Erla Tryggvadóttir og um dagskárgerð sáu Erla Tryggvadóttir og Helgi Jóhannesson. Framleiðandi er Sextán-níundu ehf. fyrir Sjónvarpið. Textað á síðu 888 í Textavarpi. Þátturinn er sýndur í fyrramálið laugardag 22 apríl klukkann 10.50 í Ríkissjónvarpinu.

[email protected]