Lambakótilettur í raspi með alles | Veitingarýni: Þrír Frakkar hjá Úlfari

Veitingastaðurinn Þrír Frakkar hjá Úlfari hefur undanfarin fimmtudagshádegi boðið upp á lambakótilettur í raspi og ákvað ég að bjóða móður minni í kótilettur og upplifa þennan íslenska klassíska rétt.

Við komum inn og fengum sæti við borð við glugga og boðnir matseðlar og drykkir, pöntuðum við kók og kótilettur, innifalið í verðinu var súpa dagsins og var hún þegin.

Brauð

Tær grænmetissúpa

Fyrst kom indælisbrauð með venjulegu smjöri, svo kom súpan tær grænmetissúpa, virkilega góð, bragðið minnti á minestrone súpuna.

Svo komu kótiletturnar með sykurbrúnuðum kartöflum, grænum baunum, rauðkáli, rabbabarasultu, feiti og brúnni sósu. Þetta alveg steinlá, gott á alla kanta og gott að hafa val um feiti eða sósu.

Þessi máltíð var sú besta sem ég hef snætt hjá Úlfari og vona ég að þetta verði hefð sem haldið verði í, því þetta er eini staðurinn sem býður upp á þennan rétt í þessum búningi eftir því sem ég best veit.

Ég átti í vandræðum með að ná móður minni út, því hún vildi bara sitja áfram og fá kótilettur aftur í kvöldmat, en á endanum tókst mér að ná henni út.

/Sverrir