Gregory Buda á Daisy! Fyrirlestur og kokteilakvöld með einum fremsta barþjóni heims

Miðvikudaginn 12. nóvember verður stórviðburður á Daisy þegar hinn margverðlaunaði kokteilsérfræðingur Gregory Buda frá BisouBisou í Montréal stígur á svið. Klukkan 14:00 heldur hann fyrirlestur undir heitinu „Cocktail Menu Development from A–Z“, þar sem hann leiðir gesti í gegnum allt ferlið við gerð kokteilseðla, frá hugmynd að framkvæmd.

Síðar um kvöldið, frá klukkan 20:00, fer Gregory sjálfur á bak við barinn og býður upp á sérhannaðan seðil með fimm eftirminnilegum kokteilum, þar sem leikgleði, fagmennska og bragðsköpun mætast í einni sprengju.

Gregory Buda er meðeigandi og yfirbarþjónn kokteil- og apéritif-barsins BisouBisou í Montréal í Kanada, sem skipar 75. sæti á listanum North America’s 50 Best Bars. Hann er þekktur fyrir nákvæmni, skapandi hugsun og kennslustíl sem hefur hvatt barþjóna um allan heim til að efla handverk sitt og lyfta faginu á hærra stig.

Þeir sem hafa áhuga á að dýpka þekkingu sína á kokteilagerð ættu ekki að láta þennan fyrirlestur fram hjá sér fara. Og þeir sem vilja einfaldlega njóta einstakra drykkja og sjá sannkallaðan meistara að verki eru hvattir til að kíkja á Daisy um kvöldið, þar sem lofað er frábærri stemningu, skapandi kokteilum og fagmennsku á heimsmælikvarða.