Frábærir dagar!

Undanfarnir dagar hafa verið mjög strembnir og hefur mikið mætt á okkar félögum að undanförnu. Ég vil þakka öllum sem hafa lagt hönd á plóg undanfarna daga og um leið óska okkur öllum til hamingju með ótrúlega vel heppnað NKF þing og mjög vel heppnaðar matreiðslukeppnir.
 

Erlendu gestir okkar höfðu á orði hversu vel heppnuð heimboðin hafi verið og gaman að koma inn á íslensk heimili og kynnast okkur og okkar fjölskyldum. Sérstakalega þótti þeim gaman að við gerðum okkur far um að gera kvöldið ógleymanlegt með því að koma þeim á óvart með hinum ýmsu uppátækjum.

Þátttakendum og sigurvegurum helgarinnar óska ég innilega til hamingju með árangurinn, enn og aftur er það að koma í ljós hversu sterkar keppnirnar eru að verða hjá okkur og aðeins örfá stig skilja á milli keppenda.  Keppnin íslenskt eldhús sem haldin var í annað skiptið er að taka á sig mynd og mikil þróun hefur orðið milli ára,  gaman er að sjá matreiðslumennina kafa djúpt inn í matreiðsluhefðir og einkenni heimahéraðs síns.

Skiptar skoðanir eru á því hvort þessi keppni eigi  að vera eins og hinar keppnirnar eða ekki, Það ræðst nú sennilega bara eftir því hvaða matreiðslumenn taka þátt, ásamt því hvernig umgjörð keppninnar verður. Keppnir eiga að fá tíma til að þróast og taka breytingum tíðarandans og er þessi keppni  engin undantekning þar á.

Það eru bjartir tímar framundan og mörg spennandi verkefni  komin í gang, nýr landsliðshópur er kominn á fullt í undirbúningi sínum fyrir HM í LUX 2010 og ný stjórn KM er að hefja undirbúning  fyrir næsta vetur. Samstarfsaðilum okkar er sífellt að fjölga og verðug verkefni sem við munum vinna að með okkar samstarfsaðilum á næstunni.

Eftir þennan vetur er ég þess fullviss að KM er á réttri braut og við munum ná að laða að okkur jafnt nýja sem  gamla félaga  til að taka þátt í að gera KM að enn stærri og öflugri klúbb en áður.

Kær Kveðja.
Alfreð Ómar Alfreðsson
Forseti Klúbbs Matreiðslumeistara