Fosshótel Glacier Lagoon opnar í júní | Myndir

Nýjasta hótelið í Fosshótel keðjunni verður Fosshótel Glacier Lagoon en framkvæmdir við hótelið hófust í apríl 2015.

Nú er loks farið að sjá fyrir endan á þessum framkvæmdum og búist er við fyrstu gestum þann 7. júní, að því er fram kemur á heimasíðu fosshotel.is.  Hótelið sem staðsett er  á Hnappavöllum við rætur Öræfajökuls verður með hinu glæsilegasta móti en ásamt hinum 104 herbergjum verður einnig veitingastaðurinn ROK staðsettur á hótelinu. ROK mun taka allt að 120 manns í sæti og verður boðið upp á úrvals hádegisverðarhlaðborð þar í sumar.

Hótelið er kjörið fyrir útivistarfólk og náttúruunnendur en þar má finna eitt vinsælasta göngusvæði landsins ásamt því að vera staðsett á milli Skaftafells og Jökulsárlóns. Svæðið í kringum hótelið hefur einmitt verið tökustaður þekktra kvikmynda- og tónlistarmyndbanda á borð við James Bond, Batman Begins og tónlistarmannsins Justin Bieber.

Myndir: fosshotel.is