Félagsfólk hvatt til að láta vita af óviðunandi aðbúnaði

Vinnustaðaeftirlitið fylgist með að reglur séu virtar á vinnustöðum um land allt.

Vinnustaðaeftirlit Fagfélaganna (MATVÍS, VM og RSÍ) og Eflingar, sem hóf starfsemi í september 2023, hefur það hlutverk að tryggja að aðstæður á vinnustöðum séu í samræmi við gildandi lög og reglur. Með þessu er komið í veg fyrir brotastarfsemi á félagssvæðum stéttarfélaganna og stuðlað að bættri vernd starfsfólks.

Eftirlitið sinnir reglulegum heimsóknum á vinnustaði bæði á höfuðborgarsvæðinu og á landsbyggðinni. Þar er meðal annars fylgst með aðbúnaði starfsfólks og því hvort farið sé að ákvæðum vinnulöggjafar.

Allir landsmenn geta sent inn ábendingar um óviðunandi aðstæður eða grun um brot á réttindum starfsfólks. Félagsfólk og aðrir sem hafa slíkar upplýsingar eru hvattir til að koma þeim á framfæri.

Við móttöku ábendinga er óskað eftir netfangi og símanúmeri sendanda til að hægt sé að hafa samband ef þörf er á frekari upplýsingum. Tryggður er fullur trúnaður gagnvart öllum sem senda inn ábendingar.

Vinnustaðaeftirlitið minnir á að virkar tilkynningar og vönduð eftirfylgni skipta sköpum í að tryggja sanngjörn og örugg vinnuskilyrði fyrir alla.