Ekki lengur bara sjálfboðavinna – Matreiðslumeistarar með nýja bækistöð

Þórir Erlingsson og Andreas Jacobsen

Rekstur Kokkalandsliðsins og Klúbbs matreiðslumeistara hefur vaxið svo mikið að ekki er lengur hægt að reiða sig eingöngu á sjálfboðaliða. Frá því í maí 2024 hefur framkvæmdaráð unnið að því að tryggja nægilegt fjármagn fyrir starfsemina og ýta úr vör ný verkefni sem hafa setið á hakanum vegna manneklu.

Sjá einnig:  Glæsilegur aðalfundur KM á Hótel Geysi – Nýtt framkvæmdaráð mun sjá um daglegan rekstur klúbbsins

Nú hefur verið stigið það skref að ráða Þóri Erlingsson sem framkvæmdastjóra og Andreas Jacobsen sem rekstrarstjóra. Þeir munu sinna þessum störfum samhliða forseta- og gjaldkerastarfinu. Skrifstofa hefur verið fengin í húsi fagfélaganna að Stórhöfða 31, klúbbnum að kostnaðarlausu.

Framtíðarsýnin er að skrifstofan verði ekki aðeins vinnuaðstaða heldur einnig afdrep fyrir félagsmenn, með setustofu, fundaraðstöðu og aðstöðu til að skrá sögu klúbbsins í stafrænt form. Þegar innréttingar eru fullgerðar verður haldið formlegt opnunarhóf.

Myndir: kokkalandslidid.is