Duck & Rose lokar á konudag – nýr staður tekur við undir nafninu Gamla Reykjavík

Veitingastaðurinn Duck & Rose mun loka dyrum sínum að kvöldi konudagsins, 22. febrúar næstkomandi, samkvæmt tilkynningu frá staðnum. Þar með lýkur ákveðnum kafla í sögu staðarins, sem hefur frá upphafi lagt áherslu á stemningu, samveru og metnaðarfulla framreiðslu.

Gestir eru hvattir til að líta við í síðasta sinn í vikunni, njóta andrúmsloftsins og þess sem staðurinn hefur haft upp á að bjóða. Lúxus brunch verður í boði alla daga fram að lokun og stefnt er að því að kveðja með sömu frábæru stemningu og einkennt hefur reksturinn frá fyrsta degi.

Í tilkynningunni kemur fram að nýr staður, Gamla Reykjavík, muni opna á sama stað föstudaginn 27. febrúar. Nánari upplýsingar um nýja staðinn verða kynntar á næstu dögum og eru gestir hvattir til að fylgjast með.

Sérstök athygli er vakin á því að gjafabréfaeigendur eru hvattir til að nýta gjafabréf sín í vikunni, þó munu öll gjafabréf gilda áfram á nýja staðnum sem inneign að upphæð. Þeir sem eiga borðabókanir eftir 22. febrúar þurfa að gera nýjar ráðstafanir, en karaoke-bókanir halda gildi sínu nema óskað sé eftir breytingum.

Að lokum þakkar staðurinn gestum sínum fyrir samfylgdina, hlýjuna og ógleymanlega stemningu á liðnum misserum.

Mynd: Facebook / Duck & Rose