Costco býður upp á veitingastað, sælkerahorn og bakarí – Verða faglærðir veitingamenn að vinna hjá fyrirtækinu?

Verslunarrisinn Costco ráðgerir að opna verslun sína í Kauptúni um mitt ár 2017.  Costco selur allt frá hjólbörðum, heimilistækjum til matvöru. Ásamt því að reka þar eldhús þar veitingastað þar sem í boði verða pylsur, nýbakaðar pítsur og ís.

Einnig kemur Costco til með að selja smáréttabakka með samlokum, sushi, sætindum ásamt öðru í svokölluðu sælkerahorni.  Bakarí verður starfrækt í versluninni þar sem allt verður bakað daglega. Ekki hafa fengist upplýsingar um hvort faglærðir veitingamenn komi til að vinna hjá fyrirtækinu.

Reiknað er með að Costco skapi 180-200 störf í byrjun með möguleikum á vexti. Verslunin státar sig af því að hafa jafnvægi í skiptingu á aldri þar sem starfsmenn eiga möguleika á að eiga góðan feril hjá fyrirtækinu. Costco vill greiða starfsfólki sínu yfir lágmarkslaunum og bjóða upp á fríðindi meðfram launum.

Brett Vigelskas mun stýra versluninni en hann byrjaði hjá fyrirtækinu 1999 sem kerrustrákur meðfram námi en hann er útskrifaður lífeindafræðingur. Hann hefur unnið 11 mismunandi störf í sex mismunandi vöruhúsum.

Costco mun sinna fyrirtækjum sem og einstaklingum en til að eiga möguleika á að versla þar þarf að borga aðildargjald upp á 4800 kr. fyrir einstaklinga og 3800 kr. fyrir fyrirtæki. Einnig er hægt að fá svokallað aukakort 2400 kr. og að hámarki sex aukakort fyrir hverja aðild. Verslunin býður fyrirtækjum upp á reikningsviðskipti.

Með fylgja myndir frá kynningafundi Costco sem fréttamaður veitingageirans tók.

Myndir: Ágúst Valve