Ásgeir bakari tók vel á móti forseta Íslands – Myndir

Ásgeir Þór Tómasson bakari og fagstjóri bakaradeildar hjá Hótel og matvælaskólanum tók vel á móti forseta Íslands

Guðni Th. Jóhannesson, forseti Íslands, mætti í Menntaskólann í Kópavogi á forvarnadaginn 6. október. Hann fór yfir mikilvægi heilbrigðs lífstíls með nemendum skólans. Hann heimsótti líka Hótel-, og matvælaskólann og heilsaði upp á nemendur Afrekssviðs.

„Nemendur buðu upp á bakkelsi, en þau voru að leggja lokahönd á margar útfærslur af skreytingum á lagtertu og marsipanstykki.

Guðni og fylgdarlið fengu að smakka lagtertu, marsipanköku og snúða með rjómaostakremi sem grunndeild bakaradeildar höfðu lagað.“

Sagði Ásgeir Þór í samtali við veitingageirinn.is aðspurður um hvað bakaradeildin var með á boðstólnum fyrir forsetaheimsóknina.

Guðni Th. Jóhannesson, forseti Íslands, skrifaði eftirfarandi á facebook í tilefni forvarnardagsins:

Forvarnardagurinn var í gær, frábært framtak sem hófst í tíð forvera míns á forsetastóli, Ólafs Ragnars Grímssonar. Ég heimsótti tvo skóla á höfuðborgarsvæðinu, Laugalækjarskóla í Reykjavík og Menntaskólinn í Kópavogi. Gaman var að ræða við ungmenni á þessum stöðum um forvarnir, skaðsemi þess að reykja eða nota nikótínpúða og skynsemina sem felst í því að byrja ekki að neyta áfengis á unga aldri.

Á forvarnardeginum í ár var einnig lögð áhersla á mikilvægi þess að ná góðum nætursvefni og varast það að neyta orkudrykkja í óhófi. Undanfarna áratugi hefur tekist að snarminnka áfengisdrykkju og tóbaksnotkun ungmenna á Íslandi þannig að eftir er tekið víða um heim. Ungmenni Íslands eru upp til hópa frábær og flott, það fann ég og sá á fundum mínum á forvarnardeginum.

Á vefsíðunni www.forvarnardagur.is stendur nú yfir leikur fyrir grunnskóla og framhaldsskólanema, þar sem þátttakendur vinna með þá þætti sem dregið geta úr áhættuhegðun. Verðlaunin verða afhent við hátíðlega athöfn á Bessastöðum síðar á árinu.

Með fylgja myndir af heimsókn forseta Íslands:

Myndir: Menntaskólinn í Kópavogi