Brad Pitt ánægður með hamborgarann í Dalakofanum

Það er ekki á hverjum degi sem ein frægasta manneskja heims gengur inn á lítinn veitingastað úti á landi og pantar sér einn af þjóðarréttum Íslendinga, sjoppuborgarann, en það er nákvæmlega það sem gerðist í Dalakofanum í Reykjadal í Þingeyjarsveit í gær, að því er fram kemur á dv.is.

„Þetta var nokkuð óvænt og ég get alveg viðurkennt það stelpurnar sem eru að þjóna til borðs voru kannski aðeins spenntar en að öðru leyti fékk hann bara að vera í friði,“

segir Ólafur Sólimann í samtali við dv.is, en Ólafur rekur Dalakofann ásamt eiginkonu sinni Guðrúnu Boyd og bætir við og segir að allt hafi þó farið fram með kyrrum kjörum.  Leikarinn heimsfrægi hafi snætt borgarann í rólegheitunum ásamt salati til hliðar og virst njóta matarins. Svo hafi hann þakkað fyrir sig, borgað og haldið sína leið á mótorhjólinu.

Ekki er vitað í hvaða erindagjörðum Pitt er hér á landi, hvort um sé að ræða frí eða undirbúning á einhverju kvikmyndaverkefni, segir á vef dv.is. Leikarinn gisti á Fosshótel Húsavík og mátti sjá mynd af honum á samfélagsmiðlum ásamt starfsfólki hótelsins.

Sjá einnig: Brad Pitt framleiðir nýtt gin

Mynd: úr safni / samsett mynd