Landbúnaðarráðuneyti ákveður tollana

Þótt fjármálaráðuneytið sjái um að afla ríkinu tekna, er það landbúnaðaráðherra sem ákveður tolla á ýmsar matvörur. Þetta bendir Hallgrímur Snorrason, formaður Matvælanefndar forsætisráðherra, á í skýrslu sinni sem birt var í gær.

Hallgrímur gagnrýnir að hvergi sé að finna á einum stað yfirlit um tolla á matvæli, þá eru viðaukar tollskrár sumir úreltir.

Fram kemur í skýrslunni að bæði skatta- og tollaumhverfi matvöru sé mjög flókið og brýnt að einfalda það. Í áranna rás hafi verið samið um frjáls utanríkisviðskipti á mörgum sviðum. Íslendingar hafi viljað tryggja sér tollfrjálsan aðgang að markaði fyrir útflutningsvörur og goldið fyrir með aðgangi fyrir innflutning á innlenda markaði. Stundum hafi tollar almennt verið felldir niður en stundum hafi niðurfellingin verið sértæk.

Niðurstaðan er meðal annars flókin flóra laga og reglugerða um mismunandi tolla, álagningu, niðurfellingu eða undanþágu. Hvergi sé að finna á einum stað yfirlit, sem er aðgengilegt fyrir fólk og framleiðendur, yfir tolla matvæla. Fólk þurfi því að leita gildandi ákvæða í mörgum viðaukum tollskrár, sem sumir hafi hvorki verið gefnir út um árabil, né verið lagaðir að breytingum á lögum sem þeir þó eigi að byggjast á. Þá heyra tollamál ekki aðeins undir fjármálaráðuneytið, sem lögum samkvæmt fer með skattheimtu og tekjuöflun ríkissjóðs, heldur hefur forræði álagningu tolla á ýmsar matvörur verið fengið landbúnaðarráðuneyti. Tollar séu lagðir á samkvæmt tollskrá og ákvörðun landbúnaðarráðherra, á grundvelli tolla- og búvörulaga.

Hallgrímur bendir á í skýrslunni að Íslendingar séu skuldbundnir Alþjóða viðskiptastofnuninni, til að heimila lágmarksinnflutning búvara. Þannig beri íslendingum að leyfa innflutning á 2,7% af heildarneyslu landsmanna af nautakjöti, öðru eins af eggjum og ostum, 1% af innanlandsneyslu af alifuglakjöti, svo dæmi sér tekið. Engar skorður eru hins vegar reistar við magni innflutnings í lögum, ef undan séu skilin skilyrði sem sett eru af heilbrigðisástæðum. Í framkvæmd er það landbúnaðarráðherra, sem ákveður þessar takmarkanir, með reglugerðum.

Greint frá á ruv.is

[email protected]