Einn fremsti kokkur heims svipti sig lífi eftir að hafa tapað milljónum í Ponzi-svindli – Eyddi fúlgum fjár í rauðvín sem hann aldrei fékk

Benoit Violier, einn fremsti kokkur heims, svipti sig lífi eftir að hafa lent í fjárhagskröggum sem rekja má til Ponzi-svindls. Violier, sem var 44 ára þegar hann lést, átti og rak Restaurant de l’Hotel de Ville-veitingahúsið nærri Lausanne í Sviss, en veitingahúsið hafði hlotið þrjár Michelin-stjörnur sem er fáheyrt.

Þrátt fyrir velgengnina og þá staðreynd að veitingastaðurinn hafi verið útnefndur sá besti í heimi í lok síðasta árs er talið að Violier hafi tapað miklum fjármunum áður en hann lést, að því er fram kemur á dv.is.

Að sögn svissneska viðskiptablaðsins Bilan hafði Violier varið umtalsverðum fjármunum til kaupa á sjaldgæfum tegundum af rauðvíni. Að sögn Bilan kostaði hver flaska á bilinu 2,5 til 5 milljónir króna og voru þær seldar til nokkurra af bestu veitingastaða heims. En flöskurnar skiluðu sér aldrei og sátu veitingahúsaeigendur eftir með sárt ennið.

Fullyrt hefur verið að fyrirtæki að nafni Private Finance Partners, svissneskt fyrirtæki með höfuðstöðvar í Sion, hafi staðið að baki Ponzi-svindlinu. Að því er Bilan greinir frá var sama flaskan stundum seld til þriggja eða fjögurra veitingahúsa.

Violier og veitingahús hans er talið hafa tapað allt að 150 milljónum króna á svindlinu, en umrætt fyrirtæki, Private Finance Partners, var úrskurðað gjaldþrota þann 30. nóvember síðastliðinn.

Violier var virtur kokkur, en hann var lagður til hinstu hvílu á laugardaginn í heimalandi sínu, Frakklandi. Sem fyrr segir var veitingahús hans valið það besta í heimi af France’s La Liste-tímaritinu, en þúsund veitingastaðir um allan heim voru tilnefndir.

Greint frá á dv.is

Mynd: restaurantcrissier.com