Stórt gjaldþrot hótelfélags á Akureyri

Skiptum á þrotabúi Hótel Sólar ehf. lauk á þriðjudaginn s.l., en ekkert fannst upp í 1.471 milljóna kröfur. Félagið átti meðal annars Hótel Akureyri í Hafnarstræti, Kjarnalund og reksturinn utan um Gistiheimili Akureyrar.

Langstærsti kröfuhafinn var Landsbankinn, en dótturfélag bankans, Hömlur, yfirtók allar eignir félagsins í janúar á þessu ári og setti þær á sölu nokkrum mánuðum seinna.

Þegar Hömlur tóku yfir eignir Hótel Sólar varð félagið einn stærsti eigandi fasteigna í miðbæ Akureyrar, en auk hótelanna voru fjölmargar eignir kringum Ráðhústorgið inn í félaginu. Í sumum þeirra var meðal annars rekin gistiþjónusta.

Í maí á þessu ári setti Hömlur eignirnar á sölu, en samkvæmt upplýsingum frá félaginu eru enn Hótel Akureyri og Kjarnalundur til sölu. Gistiheimilið og margar hinna eignanna hafa aftur á móti verið seldar, að því er fram kemur á mbl.is.

Mynd: Skjáskot af google map.

/Sverrir