Kokkalandsliðið býður upp á metnaðarfullan keppnismatseðil í kvöld

Þráinn og Viktor við undirbúning

Undirbúningur Kokkalandsliðsins fyrir Heimsmeistaramótið í matreiðslu sem fram fer á næsta ári hefst með styrktarkvöldverði liðsins í Bláa lóninu í kvöld föstudaginn 18. október. Þar býður Kokkalandsliðið upp á metnaðarfullan keppnismatseðil þar sem íslenskt hráefni er í öndvegi.

Styrktarkvöldverðurinn er fyrsta skrefið í undirbúningi liðsins til að vera í stakk búið að halda merki íslenskrar matreiðslu á lofti í komandi keppni. Markmið Kokkalandsliðsins er að skapa öfluga liðsheild sem hefur getu til að keppa meðal færustu matreiðslumeistara heimsins auk þess að vera leiðandi í að efla fagmennsku og áhuga á matargerð, segir í fréttatilkynningu.

Kokkalandsliðið ætlar að bjóða upp á fimm rétta matseðil með þessum réttum:

Steinbítskinnar hægeldaðar í kryddjurtaolíu með jarðskokkum, stökku brauði og fáfnisgrasi.

Grafinn lax og hörpuskel með skelfisksósu, spergilkáli, byggi, dilli og hrognum.

Epla- og seljurótarseyði borið fram með vatnakarsa og heslihnetum.

Lambahryggsvöðvi og – tunga með lambasoðsgljáa ásamt kartöflusmælki, villtum sveppum, sýrðum laukum, bakaðri gulrót og sítrónublóðbergi.

Skyr frá Erpsstöðum og birki-brioche með hvítsúkkulaði, rabarbara og hnetusmjöri.

Veislunni stjórnar Örn Árnason leikari. Boðið verður upp á söngatriði með þeim Matta Matt og Magna Ásgeirssyni. Kvöldverðurinn hefst kl. 19.00 og kostar 20 þúsund krónur.

Hægt er að horfa á þá Viktor, Bjarna og Hákon í Íslandi í dag með því að smella hér, þar sem fjallað er um styrktarkvöldverðinn.

Mynd: aðsend.

/Smári